На змену эстэтыцы clean girl і «ціхай раскошы» прыходзіць printmaxxing — тэндэнцыя, якая прапануе спалучаць у адным вобразе адразу некалькі ўзораў, фактур і адценняў.

Галоўнае правіла новага кірунку — не абмяжоўваць сябе прынцыпам «чым менш, тым лепш». Палоска можа суседнічаць з кветкавым матывам, геаметрыя — з анімалістычным прынтам, а рэтраўзоры — з нечаканымі сучаснымі дэталямі. Printmaxxing ператварае адзенне ў прастору для эксперыментаў і дапамагае стварыць па-сапраўднаму асабісты стыль.

Чаму прынты зноў у цэнтры ўвагі

Маладое пакаленне стамілася ад аднолькавых вобразаў з сацыяльных сетак, нейтральнай гарадской палітры і адзення, пазбаўленага характару. На фоне агульнай нестабільнасці ў свеце, эканамічных цяжкасцяў, імклівых тэхналагічных зменаў і росту коштаў мода становіцца спосабам дадаць паўсядзённасці эмоцый і колеру.

Менавіта таму ўсё часцей з’яўляюцца тэндэнцыі, заснаваныя на індывідуальнасці, дэкаратыўнасці і свабодзе самавыяўлення. Сярод іх — персаналізацыя рэчаў, эклектычныя спалучэнні, пераасэнсаванне гламуру і захапленне выразнымі дэталямі. Printmaxxing працягвае гэтую лінію, ператвараючы гардэроб у візуальны маніфест.

Як спалучаць некалькі прынтаў

Подыўмныя вобразы сезона прапануюць камбінаваць кветкавыя матывы, пайеткі, карункі і яркія аксэсуары. Асабліва эфектна выглядаюць узоры, стылізаваныя пад піксельную графіку, жывапісныя кампазіцыі або вінтажны тэкстыль.

Аднак для паўсядзённага гардэроба неабавязкова адразу выбіраць самыя складаныя спалучэнні. Пачніце з двух прынтаў, аб’яднаных агульнай каляровай гамай. Напрыклад, чорна-белыя палосы можна дапоўніць графічным малюнкам, а кветкавы матыў — падтрымаць аксэсуарам падобнага адцення.

Тым, хто аддае перавагу больш стрыманым рашэнням, падыдзе ахраматычная палітра. Чорны, белы і шэры ўраўнаважваюць нават актыўныя ўзоры і робяць вобраз цэласным. Можна спалучыць паліто з анімалістычным прынтам і спадніцу з падобным матывам або дадаць паласатыя дэталі да світэра, шаліка і сумкі.

Яшчэ адзін беспамылковы варыянт — гатовыя камплекты з выразным малюнкам. Асабліва актуальныя жакардавыя тканіны і ўзоры, якія нагадваюць вінтажную абіўку, габелены або дэкаратыўныя пано. Такія ансамблі выглядаюць святочна, але пры гэтым лёгка ўпісваюцца ў сучасны гардэроб.

Printmaxxing не патрабуе бездакорнага густу або строгіх правілаў. Яго сутнасць — у задавальненні ад спалучэнняў, смеласці і здольнасці паказаць уласны настрой праз адзенне. Часам менавіта самы нечаканы прынт становіцца той дэталлю, якая робіць вобраз запамінальным.

Марыя Асмалоўская