У школе Маргарыта была круглай выдатніцай — у яе дзённіку «прапісаліся» выключна дзясяткі. Бацькі ганарыліся дачкой, а калі тая скончыла восьмы клас, прапанавалі паступаць у Ліцэй імя Ф.Э. Дзяржынскага БДУ, паколькі выпускнікам гэтай навучальнай установы адкрыты дзверы ў лепшую ВНУ краіны — БДУ. І яна рызыкнула. Перш за ўсё прайшла падрыхтоўчыя курсы «Вячэрні Ліцэй», на якіх школьнікі павышаюць свае кампетэнцыі па профільных прадметах. Потым паспяхова здала экзаменацыйныя іспыты і паступіла ў адзін з прэстыжных ліцэяў.

Цяпер, азіраючыся назад, Маргарыта з радасцю ўспамінае два навучальныя гады і прызнаецца, што гэта быў цудоўны час. Літаральна з першых дзён яе ўразіла ўнутраная атмасфера ва ўстанове: адкрытасць, дружалюбнасць, гатоўнасць выкладчыкаў і навучэнцаў прыйсці навічкам на дапамогу. 

Вывучаючы профільныя прадметы, Маргарыта Максімовіч стала актыўна ўдзельнічаць у алімпіядах і канферэнцыях, спыніўшы свой выбар на навуковай дзейнасці.

 

— Больш за іншыя мяне захапіла тэма «Стаўленне экспертаў са сферы эканомікі да выкарыстання штучнага інтэлекту ў складанні эканамічных прагнозаў». Распрацоўваючы яе, стала вывучаць меркаванні аб ШІ самых розных спецыялістаў. Збірала інфармацыю з эканамічных артыкулаў, іншых крыніц, водгукі прадстаўнікоў вядучых кампаній. Сама інтэрв’юіравала выкладчыкаў ліцэя і БДУ. У ходзе даследавання было важна зразумець, наколькі глыбока тэхналогіі штучнага інтэлекту выкарыстоўваюцца ў эканоміцы, — тлумачыць яна. — Мне ўдалося знайсці адказы на ўсе пытанні, у тым ліку як дапамагае ШІ складаць прагнозы, наколькі эканамісты давяраюць яму і якія бачаць праблемы і перашкоды ў ходзе яго выкарыстання.

Другой не менш важнай стала навуковая работа на тэму «Уплыў гульнявых методык у адукацыі на фарміраванне ключавых кампетэнцыяй і якасцей XXI стагоддзя». Займаючыся даследаваннямі, Маргарыта распрацавала набор дзелавых і адукацыйных эканамічных гульняў для навучэнцаў старшых класаў.

 

Займаючыся навукай, дзяўчына прадаўжала рыхтавацца да паступлення ва ўніверсітэт. Паколькі базавымі заставаліся матэматыка і англійская мова, то штудзіравала менавіта гэтыя прадметы штодзённа, асабліва на працягу апошняга навучальнага года. А вось рускую мову вырашыла падцягнуць з рэпетытарам.

— На экзаменах не вельмі хвалявалася. Як і большасць маіх сяброў па ліцэі, адчувала маральную падтрымку нашых педагогаў. Перад паездкай на экзамен нам арганізавалі прывітальнае снеданне — з чаем і мафінамі. Калі ехалі ў аўтобусе на экзамены, мы размаўлялі, жартавалі, смяяліся. Вядома, нехта паўтараў тэмы, але асабіста я была ўжо гатова і спакойна. Ведала, што прыйду ў аўдыторыю і ўсё зраблю, як трэба, — успамінае Маргарыта Максімовіч. — У выніку набрала 295 балаў: па 100 балаў — матэматыка і руская мова, 95 — англійская. У атэстаце — адны дзясяткі. Разам у мяне 395 балаў!

З ВНУ, куды будзе паступаць, Маргарыта вызначылася яшчэ на курсах у ліцэі. Выбар прыпаў на эканамічны факультэт Беларускага дзяржаўнага ўніверсітэта. Будучая спецыяльнасць нашай гераіні — «эканамічная інфарматыка».