У апошнія дні гараджан цікавіла пытанне, чаму з дома № 133 на пр. Незалежнасці знік знакаміты надпіс. Як высветлілася, яго здымалі для абнаўлення, паведамляе агенцтва «Мінск-Навіны».
У ЖКГ Першамайскага раёна растлумачылі, што з лютага ў жылым доме праводзіцца капітальны рамонт, які ўключае афарбоўку фасада і абнаўленне інжынерных сістэм. Паралельна з гэтым супрацоўнікі прадпрыемства «Мінгарсвятло» правялі планавыя работы па тэхнічным абслугоўванні элементаў архітэктурнага асвятлення надпісу «КВІТНЕЙ, РОДНАЯ БЕЛАРУСЬ».
— Светлавое абсталяванне заменена на новае (святлодыёднае), усе металічныя элементы каркаса правераныя і афарбаваныя, — паведамілі ва УП «Мінгарсвятло».
На сённяшні дзень усе дэманціраваныя літары ўжо ўстаноўленыя на ранейшае месца.
