У Беларусі 7 мая на большай частцы тэрыторыі краіны чакаюцца навальніцы, месцамі моцныя ліўні і шквалістае ўзмацненне ветру. У сувязі з гэтым аб'яўлены аранжавы ўзровень небяспекі, паведамілі БелТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
У чацвер будзе пераменная воблачнасць. Ноччу па паўночна-заходняй палове, днём на большай частцы тэрыторыі краіны чакаюцца кароткачасовыя дажджы, навальніцы, днём пры навальніцах месцамі пройдуць моцныя ліўні. Ноччу і раніцай у асобных раёнах магчымы слабы туман. Вецер прагназуецца пераменных напрамкаў 4-9 м/с, пры навальніцах з парывамі да 14 м/с, днём у асобных раёнах шквалістае ўзмацненне ветру з парывамі да 15-20 м/с.
Тэмпература паветра ноччу складзе ад +10 °С да +15 °С, месцамі 5-9 °С. Днём будзе ад +16 °С па паўночным захадзе да +30 °С па паўднёвым усходзе.
