Члены ўчастковых камісій дэманструюць высокую арганізаванасць на выбарах у Нацыянальны сход (аднапалатны парламент) Рэспублікі Арменія, адзначыла начальнік прававога аддзела апарату ЦВК Беларусі Алена Грыгаровіч, якая ажыццяўляе міжнароднае назіранне за выбарамі на ўчастках у горадзе Ерэване, паведамляе БелТА са спасылкай на ЦВК Беларусі.
Паводле яе слоў, абавязкі кожнага члена камісіі строга размеркаваны ў адпаведнасці з законам. Ход галасавання на кожным участку трансліруецца на сайце ЦВК Арменіі.
Алена Грыгаровіч назірае за ходам выбарчага працэсу і выкананнем прадугледжаных заканадаўствам працэдур, знаёміцца з арганізацыяй галасавання, работай участковых камісій і ўмовамі, створанымі для выбаршчыкаў.
Паводле інфармацыі ЦВК, за выбарамі ў Арменіі назіраюць больш за 300 міжнародных наглядальнікаў. Начальнік прававога аддзела апарату ЦВК Беларусі Алена Грыгаровіч назірае ў складзе Місіі наглядальнікаў ад СНД. Акрамя замежных экспертаў, за ходам выбараў назіраюць прадстаўнікі мясцовых грамадскіх арганізацый.
Назіранне ажыццяўляецца ў адпаведнасці з прынцыпамі палітычнай нейтральнасці, аб’ектыўнасці і неўмяшання ва ўнутраныя справы дзяржавы.
На выбарах у Нацыянальны сход 16 палітычных партый і два партыйныя альянсы вылучылі больш за 2 тыс. кандыдатаў. 101 мандат размяркуюць прапарцыянальна атрыманым галасам паміж палітычнымі аб’яднаннямі, якія пераадолелі электаральны бар’ер: 4 працэнты — галасоў для партый, 8 працэнтаў — для альянсаў з дзвюх і трох партый, 10 працэнтаў — для альянсаў з чатырох і больш партый.
Яшчэ чатыры мандаты зарэзерваваны для прадстаўнікоў буйнейшых у Арменіі этнічных абшчын: рускіх, язідаў, асірыйцаў і курдаў.
У кожнай партыі свой бюлетэнь, у якім пазначаны яе назва, атрыманы пры жараб’ёўцы парадкавы нумар, а таксама імёны першых трох кандыдатаў у партыйным выбарчым спісе.
Выбаршчыку трэба выбраць бюлетэнь адной з партый/альянсу і пакласці яго ў спецыяльны канверт з адрэзаным канцом. Праз адтуліну на бюлетэнь наклеяць спецыяльную марку, а затым канверт можна апусціць у скрыню для галасавання.
265 работнікаў дыпламатычных прадстаўніцтваў і ваеннаслужачых, якія знаходзяцца ў камандзіроўцы за мяжой, маглі прагаласаваць на сайце ЦВК Арменіі. Гэты спосаб упершыню быў прыменены на парламенцкіх выбарах 2021 года. Галасаванне анлайн было запушчана за дзевяць дзён да дня выбараў і доўжылася тры дні.
Як растлумачылі ў ЦВК, прагаласаваць грамадзяне Арменіі могуць толькі на тэрыторыі сваёй краіны. Для гэтага ўтвораны 2005 выбарчых участкаў, на якіх можна прагаласаваць да 20.00.
Участкі для галасавання за мяжой не ўтвараюцца ў адпаведнасці з заканадаўствам Арменіі з 2007 года.
