НАК БССР быў створаны 22 сакавіка 1991 года, а з моманту набыцця нашай краінай незалежнасці атрымаў назву Нацыянальны алімпійскі камітэт Рэспублікі Беларусь. На 101-й сесіі МАК у верасні 1993 года НАК стаў членам Міжнароднага алімпійскага камітэта — Беларусь атрымала права дэлегаваць на Алімпійскія гульні сваю нацыянальную каманду.

Першым кіраўніком НАК быў выбраны Уладзімір Рыжанкоў. У 1997 годзе арганізацыю ўзначаліў Прэзідэнт Беларусі Аляксандр Лукашэнка, які працаваў на гэтай пасадзе амаль чвэрць стагоддзя. З 2021 года кіраўніком НАК з’яўляецца Віктар Лукашэнка.

З 1994 года беларускія атлеты выступілі на дзевяці зімовых і васьмі летніх Алімпійскіх гульнях. На галоўных стартах чатырохгоддзя нашы спартсмены заваявалі 109 медалёў (22 залатыя, 39 сярэбраных, 48 бронзавых) і па колькасці ўзнагарод перасягнулі дасягненне савецкага перыяду (108).

За 35 гадоў у краіне было ўзведзена шмат сучасных спартыўных комплексаў, стадыёнаў і трэніровачных баз. Сёння ў Беларусі функцыянуюць больш як 23 тыс. фізкультурна-спартыўных збудаванняў, што дае магчымасць атлетам якасна трэніравацца і паказваць высокія рэзультаты на міжнароднай арэне, а таксама робіць заняткі спортам даступнымі для ўсіх беларусаў.