У Беларусі з 1 верасня павышаюцца ўсе віды працоўных пенсій — па ўзросце, за выслугу гадоў, па інваліднасці, з прычыны страты карміцеля. Аб гэтым паведамляе БелТА.
У выніку пераразліку памер працоўнай пенсіі павялічыцца ў сярэднім на 5%. Гэта другое павышэнне сёлета. Першае праведзена з 1 лютага на 10%.
Па папярэдняй ацэнцы, сярэдні памер пенсіі па ўзросце ў верасні 2026 года складзе 1125 рублёў. Гадавое павелічэнне (верасень 2026 года да верасня 2025-га) складзе 145 рублёў, ці 14,8%.
«Памер павелічэння працоўнай пенсіі ў кожнага пенсіянера будзе свой у залежнасці ад працягласці стажу і велічыні заробку, улічаных пры вылічэнні яму пенсіі, а таксама ўстаноўленых даплат да асноўнай пенсіі. Пенсіі будуць пераразлічаны як непрацуючым, так і працуючым пенсіянерам», — падкрэслілі ў ведамстве.
У Мінпрацы таксама адзначылі, што павышэнне пенсій будзе праведзена ў аўтаматычным рэжыме. Наведваць пенсійныя органы не патрабуецца, рассыланне апавяшчэнняў, тэлефонныя званкі не ажыццяўляюцца.
У цэлым у верасні выдаткі на выплату пенсій складуць прыкладна 2,6 млрд рублёў, з іх на павышэнне пенсій будзе накіравана 125 млн рублёў. Працоўныя пенсіі ў Беларусі, паводле звестак міністэрства, атрымліваюць больш за 2,3 млн пенсіянераў.
