«Мы не хочам быць чарговы раз падманутымі»

Пачалі з «вострага». «Ці ўлічваеце вы рызыкі ад вайны пошлін, абвешчанай прэзідэнтам Трампам, якая выклікала шок на біржах?» — спытаў Радзік Батыршын. Аляксандр Лукашэнка адказаў як кіраўнік дзяржавы і як эканаміст: «Гэта мяне насцярожыла». Але, расказаў Прэзідэнт, разам з расійскім калегам Уладзімірам Пуціным, абмяркоўваючы гэта пытанне, яны прыйшлі да высновы, што пакуль за гэтым трэба назіраць. «Вы што, упэўненыя, што так і будзе, як Дональд заявіў? Ён ужо ўчора заявіў, што гатовы весці перагаворы то з Кітаем, то яшчэ з кімсьці для таго, каб заключыць здзелку па тарыфах. Гэта значыць, яны гатовыя і адступіць», — заўважыў Аляксандр Лукашэнка.

Беларускі лідар звярнуў увагу, што эканоміка ЗША ўваходзіць у лік вядучых у свеце, займае значную долю сусветнага ВУП. «А яны ж аб’явілі 75 працэнтам краін вайну па ВУП: Японіі той жа, Еўрасаюзу і гэтак далей. „Вось мы абыдземся“. Можа, і абыдзецеся, вырабіце сваю прадукцыю для таго, каб забяспечыць 300 мільёнаў чалавек, долар надрукуеце. Але гэта сёння. А што будзе заўтра? Мабыць, Дональд Трамп так прыкінуў, паглядзеў і думае: „Рэзкавата ўзяў, мусіць, трэба (калі гэта трэба) палічыць спачатку, а потым і адступіць“. Таму я спакойна за гэтым назіраю. А што будзе далей...» — адзначыў Аляксандр Лукашэнка. 

Паводле яго слоў, Беларусі і Расіі не варта наконт гэтага хвалявацца. Супраць нашых краін ужо столькі санкцый увялі, што далей няма куды. «І мы вытрымалі, мы выдужалі, — падкрэсліў кіраўнік дзяржавы. — І калі мы гэтым шляхам будзем ісці, не будзем на слова верыць „вы нам 30 дзён цішыні дайце на фронце“, „вы нам тое дайце“, а ўзамен — нічога, дык якая размова можа быць. Мы не хочам быць чарговы раз падманутымі. Таму шчыра кажу: мяне гэта непакоіць, бо алагічна, гэта ненармальна з пункту гледжання эканомікі.Але з іншага боку, трэба пачакаць, паглядзім, што з гэтага атрымаецца». У сувязі з гэтым Аляксандр Лукашэнка нагадаў аб важным. «Пакуль нам трэба ўзмацняць сваё», — канстатаваў ён.

«Гэта наш гонар»

Пагаварылі і пра актуальныя спартыўныя навіны. Самая гучныя цяпер — рэкорд Аляксандра Авечкіна па колькасці закінутых шайб у Нацыянальнай хакейнай лізе. У выхадныя хакеіст «Вашынгтон Кэпіталз» забіў свой 895-ы гол і пабіў 26-гадовы рэкорд канадца Уэйна Грэцкі. Такая падзея па-за ўвагай Аляксандра Лукашэнкі, які сам гуляе ў хакей, застацца не магла. «Авечкін — маладзец. Наш хлопец, рускі чалавек і пабіў рэкорд у НХЛ. Магчыма, камусьці было непрыемна. Яны ж раўнівыя, спартсмены, але паглядзіце, як усе радаваліся гэтаму. Гэта трэба, каб Саша Авечкін, рускі чалавек, павярнуў іх у свой бок. Гэта гонар», — сказаў Прэзідэнт. Па яго словах, пераўзысці гэты рэкорд будзе вельмі цяжка, амаль немагчыма. Аляксандр Лукашэнка звярнуў увагу, што Аляксандр Авечкін устанавіў яго амаль у 40 гадоў, а большасць спартсменаў у 27-32 гады стамляюцца і гуляць не могуць. «У 32 гады толькі пачынаць трэба гуляць. Толькі трэба рыхтавацца і выступаць. Вось 40 гадоў хлопец — прыемна паглядзець. І, трэба аддаць належнае, ён жа гуляе. Гэта ж машына», — адзначыў Прэзідэнт. 

Ён расказаў, што сочыць за Авечкіным яшчэ і таму, што ў адной камандзе з ім гуляе беларускі хакеіст Аляксей Протас, які аддаў Авечкіну шмат галявых перадач. «Гэта наш гонар. А я як чалавек, улюбёны ў хакей, не магу не ганарыцца і не радавацца. Малайчына. Я ад душы яго віншую», — падзяліўся Прэзідэнт.

«Не бываць там, прадстаўляючы гераічны беларускі народ, — было б няправільна»

Радзік Батыршын заўважыў, што ў Аляксандра Лукашэнкі ёсць традыцыя святкаваць Дзень Перамогі ў Мінску і ў Маскве. Ён пацікавіўся, адкуль яна пайшла. Кіраўнік дзяржавы расказаў, што гэта традыцыя ўзнікла ў час яго першага візіту ў Маскву ў статусе Прэзідэнта. У той час Прэзідэнтам Расіі быў Барыс Ельцын. 

• «Я заходжу ў пакой, дзе мы сустракаемся. Пасярэдзіне доўгі стол. Я зайшоў з аднаго боку, ён — з другога. І мы стаім насупраць і глядзім адзін на аднаго. Я гляджу, Ельцын такі гераічны, а ў вачах я ўбачыў нейкую разгубленасць. І я хутчэй сарыентаваўся і кажу: „Барыс Мікалаевіч, калі вы думаеце, што я прыехаў у чужую Маскву, то вы памыляецеся, гэта і мая Масква“. Барыс Мікалаевіч тут, вядома, „растаў“, размова пачалася. Таму гэта і мая Масква. Мы жылі ў той краіне. Першы парад Перамогі прайшоў на Краснай плошчы, заўсёды быў на Краснай плошчы і ў адзінай дзяржаве, і калі мы разышліся па сваіх кватэрах, парады заўсёды праходзілі», — падзяліўся Аляксандр Лукашэнка. Ён працягнуў, што традыцыю сустракаць Дзень Перамогі ў Маскве заклаў і Уладзімір Пуцін, які запрашае нацыянальных лідараў на парады.

«Мы цвёрда стаялі на тым, што 9 Мая — гэта Дзень Перамогі. І не бываць на Краснай плошчы (нават не таму, што гэта была адзіная Перамога), не бываць там, прадстаўляючы гераічны беларускі народ, — было б няправільна», — растлумачыў кіраўнік дзяржавы. Таму склалася такая традыцыя, што Аляксандр Лукашэнка заўсёды наведвае мерапрыемствы ў Расійскай Федэрацыі, вяртаецца дамоў і вечарам святкуе з беларусамі. 

Паводле слоў Прэзідэнта, беларусы любяць гэтыя мерапрыемствы, на іх заўсёды збіраецца шмат людзей.

Беларускі лідар таксама падкрэсліў, што ваенныя парады на Дзень Перамогі або Дзень Незалежнасці — гэта не бразганне зброяй: «Гэта для таго, каб бачылі, што ёсць людзі і зброя, якой мы гатовы абараніць сваю краіну і мірную працу нашых грамадзян».

«Мы пастаўляем для высокатэхналагічных галін у Расіі сваю высокатэхналагічную прадукцыю»

Старшыня МТРК «Мір» пацікавіўся, што ўжо зроблена і што яшчэ трэба зрабіць для павышэння дабрабыту людзей у дзвюх краінах у рамках Саюзнай дзяржавы. «Хачу нагадаць, што летась Беларусь дасягнула выдатных вынікаў у эканоміцы. Тэмпы росту ў эканоміцы Беларусі былі вышэйшыя, чым у Германіі, больш як 4 працэнты. Цяпер мы бачым у сусветнай эканоміцы велізарную турбулентнасць. Ці атрымаецца захаваць тэмпы росту эканомікі Беларусі сёлета?» — пацікавіўся Радзік Батыршын.

Аляксандр Лукашэнка адзначыў, што тэмпы росту застануцца прыкладна такімі ж. Гаворачы аб лічбах, ён заўважыў, што ўвесь час «падрастае база», да якой лічаць працэнты росту. «Да нуля лягчэй прырастаць, чым да 90 %. Таму, натуральна, 4,5 або 5 % ні ў нас, ні ў Расіі ўвесь час быць не можа. Але гэта не страшна. Таму што той працэнт ці два, да якога мы будзем прырастаць у 2027–2030 гадах, будзе больш важкім, чым сённяшнія тры, чатыры ці пяць працэнтаў. Гэта так, калі эканамічна разважаць, — падкрэсліў Прэзідэнт. — Таму спадзявацца на тое, што ўвесь час будзем расці на 5 %, не даводзіцца. Але вы маеце рацыю, што мы ў 2024 годзе прыраслі больш, чым Германія. І мы пра гэта можам казаць, таму што ў нас не нуль, у нас вельмі высокая была база эканомікі. І нам 4 % дадаць вельмі складана».

Паводле слоў Прэзідэнта, трэба падзякаваць заходнім кампаніям, якія збеглі з расійскага і беларускага рынку. Ён заўважыў, што збеглі з розных абласцей, і вельмі важная з іх — забеспячэнне людзей. «Усё, каб забяспечыць людзей, у Беларусі ў наяўнасці», — запэўніў ён. 

Гаворачы пра высокатэхналагічныя вытворчасці, кіраўнік дзяржавы прывёў для прыкладу завод «Інтэграл»: «Толькі Беларусь захавала асновы мікраэлектронікі. І мы сёння запатрабаваны на нашым асноўным рынку і не толькі. Мы захавалі школу, захавалі нашы магчымасці, і гэта дало нам прырост у тым ліку ў эканоміцы, перш за ўсё за кошт расійскага рынку. 

Для абароннай зброі, для космасу, для атамнай станцыі мы вельмі шмат чаго вырабляем. 

І ў большасці мы пастаўляем для высокатэхналагічных галін у Расіі сваю высокатэхналагічную прадукцыю».

Уражанне размовы з экспертам па большасці пытанняў

Пасля размовы з Прэзідэнтам у гутарцы са сваімі калегамі Радзік Батыршын падзяліўся ўражаннямі ад гэтага інтэрв’ю. «Я глыбока ўдзячны Аляксандру Рыгоравічу за тое, што першае пасля ўступлення на пасаду Прэзідэнта інтэрв’ю ён даў нашай тэлекампаніі», — сказаў старшыня МТРК «Мір». Ён расказаў, што ў інтэрв’ю закранулі пытанні эканомікі, бяспекі, меры, якія прымаюцца для таго, каб людзям жылося лепей. «Што ўразіла, дык гэта дэталёвая паглыбленасць кіраўніка дзяржавы ва ўсе эканамічныя і палітычныя пытанні. Гэта датычылася і пытанняў бяспекі ў рамках Саюзнай дзяржавы. Гэта датычылася тых няпростых працэсаў, якія адбываюцца ў свеце. Зразумела, што выбухны характар сітуацыі ў свеце паўплывае на эканоміку не толькі Беларусі, але і іншых краін. Мяне ўразіў спакой Аляксандра Рыгоравіча, які сказаў: „Давайце пакуль паназіраем“. А энцыклапедычныя веды Прэзідэнта аб усіх дэталях і працэсах у мяне як у журналіста пакінулі ўражанне размовы з экспертам па большасці пытанняў», — падсумаваў Радзік Батыршын.