«Мы сабраліся сёння тут у часы, калі міжнародная сітуацыя праходзіць праз шэраг глыбокіх пераўтварэнняў. І наступствы гэтай сітуацыі закранаюць усе краіны свету. Мы разважаем аб тым, як усе гэтыя падзеі могуць адбіцца на геапалітычнай сітуацыі і як нам супрацьстаяць той вялікай колькасці пытанняў, што існуюць у сучасным свеце», — сказаў Сібі Джордж.

Намеснік кіраўніка МЗС Індыі дадаў: «Мы лічым, што неабходна звяртаць больш увагі на забеспячэнне ўстойлівасці ланцужкоў паставак, паколькі калектыўныя дзеянні асабліва важныя для падтрымання стабільнасці глабальнай сітуацыі. Складанасць міжнароднай сітуацыі таксама ўскладняецца праблемамі ў тэхналагічнай сферы, гандлі, спрэчкамі аб тарыфах, а таксама мы бачым пагрозы транснацыянальнага тэрарызму. І гэта ўсё патрабуе ад нас вельмі дакладнай рэакцыі і пошуку адказаў. Мы павінны шукаць іх у міжнародным супрацоўніцтве. Асабліва калі мы ўсе сутыкнуліся з мноствам праблем. Толькі разам мы можам вырашыць іх эфектыўным шляхам».

Па словах Сібі Джорджа, відаць, што састарэлыя структуры не могуць улічваць усю складанасць цяперашняй сітуацыі. У сувязі з гэтым ён звярнуў увагу на пяць важных момантаў, якія дадуць магчымасць зразумець, як прыйсці да мірнага суіснавання і забеспячэння сусветнага парадку для ўсіх краін. «Транснацыянальны тэрарызм застаецца найбольш сур’ёзнай праблемай, з якой сутыкнулася чалавецтва, — канстатаваў намеснік міністра замежных спраў Індыі. — Тэрарызм — гэта агульная пагроза, з якой сутыкаемся мы ўсе».

Сібі Джордж адзначыў, што таксама неабходна звяртаць увагу на эфектыўную работу транспартных калідораў, якія могуць дазволіць раскрыць увесь гандлёвы патэнцыял кантынента. «Мы гатовы супрацоўнічаць па пытаннях больш эфектыўнай работы гэтых калідораў па ўсім кантыненце, паколькі мы верым, што лагістыка і транспартныя сістэмы могуць стаць прынцыпамі, якія будуць садзейнічаць празрыстасці, больш шырокаму ўдзелу, больш дакладнаму выкананню мясцовых прыярытэтаў, фінансавай стабільнасці і захаванню суверэнітэту і тэрытарыяльнай мэты».

«Яшчэ адзін пункт, які я хачу згадаць, — гэта праблемы, з якімі сутыкаецца Глабальны Поўдзень, — сказаў Сібі Джордж. — Зараз Індыя праводзіць каля 600 праектаў па развіцці ў супрацоўніцтве з 78 краінамі. Сферы самыя разнастайныя — і гандаль, і культура, і энергетыка, інжынірынг, ахова здароўя, спорт, навука, ІТ, гуманітарная дапамога, а таксама захаванне культурнай спадчыны». Ён звярнуў увагу, што шэраг ініцыятыў, у якіх задзейнічана Індыя, — павышэнне якасці жыцця, дабрабыту і развіцця эканомікі краін Глабальнага Поўдня. Ён таксама дадаў, што Індыя робіць свой уклад у адказы і рэакцыю на змяненне клімату і праблемы, звязаныя з гэтым.

Як адзначыў Сібі Джордж, у гэтым шматпалярным свеце важна супрацоўніцтва з краінамі еўразійскай прасторы: «Яна адыгрывае крытычна важную ролю ў вырашэнні самых розных праблем, з якімі сутыкаюцца нашы рэгіёны».