Пераднавагоднія дні — добрая магчымасць ахінуць клопатам і ўвагай тых, хто так мае ў гэтым патрэбу: дзетак, якія засталіся без апекі родных бацькоў, бабуль і дзядуль, якім таксама часам не хапае простай душэўнай цеплыні. Дабрачынныя акцыі «Нашы дзеці» і «Ад усёй душы», якія не першы год праводзяцца па ініцыятыве і пад патранатам Прэзідэнта Беларусі, шырока крочаць па ўсіх раёнах краіны. Маленькіх і сталых жыхароў Полацка прыехала павіншаваць Старшыня Савета Рэспублікі Наталля Качанава.
Першым пунктам святочнага маршруту стала Полацкае кадэцкае вучылішча, на пляцоўцы якога сабраліся больш за 100 чалавек — удзельнікаў і гасцей акцыі «Нашы дзеці». Інтэрактыўнае тэатралізаванае прадстаўленне, святочныя майстар-класы, магчымасць пагаварыць з вядомымі героямі казак і мультфільмаў і, вядома, доўгачаканыя падарункі — усё ў гэты цёплы снежаньскі дзень было для дзяцей-сірот і тых, хто застаўся без апекі бацькоў. Да святочнага карагода далучыліся і ганаровыя госці: Наталля Качанава, старшыня Полацкага райвыканкама Ігар Марковіч і іншыя.
«Гэтая выдатная акцыя, якую ініцыяваў Прэзідэнт, сёння крочыць па краіне і з кожным годам набірае ўсё больш і больш абаротаў. Гэта было мудрае рашэнне. Вы бачыце, якая рэакцыя ў дзяцей, яны чакаюць гэтага свята, як і мы, дарослыя, спадзеючыся на цуд. Усе дзеткі добрыя, у іх няпросты лёс. Хтосьці застаўся без бацькоў зусім, хтосьці сёння ў апякунскай сям’і, у дзіцячых дамах сямейнага тыпу. Але якія яны спагадлівыя, добрыя, яны сапраўдныя патрыёты сваёй краіны. Яны з вялікай радасцю перадавалі прывітанне Прэзідэнту і казалі добрыя словы. Я спытала, што яму перадаць. Яны сказалі: „Скажыце, што ён вельмі добры“. Атмасфера, якая пануе на такіх мерапрыемствах, гаворыць, што дзеці добрыя, трэба ўдзяляць ім увагу, і яны ніколі не падвядуць ні нас, ні сваю краіну», — адзначыла Старшыня Савета Рэспублікі, адрасаваўшы дзеткам самыя цёплыя віншаванні напярэдадні Новага года.
А на базе сярэдняй школы № 16 горада Полацка ў рамках акцыі «Ад усёй душы» Наталля Іванаўна сустрэлася з ветэранамі педагагічнай працы Полацкага раёна. За кубкам гарбаты былыя педагогі, якія ўнеслі вялікі ўклад у выхаванне не аднаго пакалення дзяцей, абмеркавалі са Старшынёй Савета Рэспублікі найбольш актуальныя для краіны пытанні: абстаноўку на міжнароднай арэне, патрыятычнае выхаванне моладзі, перадачу вопыту маладым спецыялістам. Падчас шчырай размовы высветлілася, што многія з педагогаў, якія ўжо знаходзяцца на пенсіі, і дагэтуль вядуць актыўны лад жыцця, удзельнічаюць у мясцовых праектах і ініцыятывах.
За агульным святочным сталом абмяркоўваліся і пытанні развіцця і добраўпарадкавання самага старажытнага горада нашай краіны. Удзельнікі сустрэчы дзякавалі старшыні райвыканкама Ігару Марковічу за тыя пазітыўныя змены ў інфраструктуры, якія апошнім часам адбыліся ў Полацку.
Наталля Качанава адзначыла, што акцыя «Ад усёй душы», ініцыяваная Прэзідэнтам Беларусі, ужо некалькі гадоў праводзіцца з вялікім поспехам. «Гэта яшчэ адна нагода падзякаваць людзям, якія працавалі шмат гадоў на карысць роднай краіны. Я з вялікай радасцю хацела б павіншаваць усіх людзей старэйшага пакалення з надыходзячымі святамі і пажадаць ім усяго добрага, падзякаваць ім за працу. Гэта сапраўды патрыёты сваёй краіны, яны яе бязмерна любяць», — заключыла Старшыня Савета Рэспублікі.
Фота БелТА
