Мерапрыемства ў такім фармаце па выніках адзінага дня прыёму грамадзян членамі Савета Рэспублікі — традыцыйнае. Адзіны дзень прыёму грамадзян сенатарамі прайшоў 3 сакавіка ва ўсіх раёнах Мінскай вобласці. Па кожным звароце даваліся канкрэтныя даручэнні, кожная праблема, якая хвалюе грамадзян, бралася на кантроль. «Такая форма работы намі праводзіцца ўжо не першы год, — звярнула ўвагу Наталля Качанава. — У Мінскай вобласці папярэдні раз мы праводзілі ў кастрычніку 2022 года, з таго часу зроблена вельмі шмат. Практычна ўсе задачы, запісаныя ў пратакол па выніках таго прыёму, выкананы».
Старшыня Савета Рэспублікі падкрэсліла, што работа з людзьмі для кожнага дзяржаўнага органа, прыёмы і сустрэчы з людзьмі вельмі важныя. «У гэтым годзе мы правялі выбары Прэзідэнта нашай краіны, народ нам аказаў вельмі сур’ёзны давер, — канстатавала спікер. — Аляксандр Лукашэнка на гэты конт выразна сказаў: народ нам даверыў краіну — і мы павінны апраўдаць давер народа. А апраўдаць гэты давер кожны з нас зможа, калі ўсе мы будзем вельмі актыўна працаваць і выконваць свае функцыянальныя абавязкі, задачы, якія стаяць перад кожным з нас. Як адзначыў сёння Прэзідэнт нашай краіны, прымаючы даверчыя граматы, мы пабудавалі дзяржаву для народа. А калі гэтая дзяржава для народа — мы павінны ўмець слухаць людзей, пытанні, якія паступаюць да нас, разглядаць эфектыўна».
Работа са зваротамі грамадзян паказвае: ёсць пытанні, на якія трэба звярнуць увагу. «Гэта перш за ўсё паўторныя звароты, у тым ліку калектыўныя, — канкрэтызавала Наталля Качанава. — Акрамя таго, мы ўбачылі пытанні, якія датычацца выхаваўчага працэсу ў школах. Таксама нам, дэпутацкаму корпусу трэба звярнуць асаблівую ўвагу на органы мясцовага самакіравання. Пераканана: мы павінны пабываць усюды, у кожнай вёсцы, дайсці да кожнага чалавека. Там жывуць нашы людзі. Гэта наша ключавая задача».
Паводле БелТА
Фота БелТА
