Канцэрт «Настаўнік & вучань», на якім выступяць педагогі-выпускнікі Рэспубліканскай гімназіі-каледжа пры Беларускай дзяржаўнай акадэміі музыкі, адбудзецца ў Малой зале ім. Г. Шырмы Белдзяржфілармоніі 14 мая, паведамляе агенцтва «Минск-Новости».
Канцэрт прысвечаны 90-годдзю Рэспубліканскай гімназіі-каледжа пры Беларускай дзяржаўнай акадэміі музыкі.
Выступяць лаўрэаты міжнародных конкурсаў Юлія Архангельская і Аляксандр Баравікоў, а таксама іх таленавітыя выхаванцы, выпускнікі каледжа гэтага года — Аляксандра Мудрак і Яўген Кручкоў.
Слухачы таксама змогуць пазнаёміцца з кітайскай піяністкай, якая пачала навучанне ў Беларусі на падрыхтоўчым курсе Рэспубліканскай гімназіі-каледжа, а сёлета сканчае Беларускую дзяржаўную акадэмію музыкі ў класе выкладчыка Аляксандра Яўгенавіча Палякова, — Цзян Лінюй.
