Асноўнае пытанне сённяшняга абмеркавання — уборачная кампанія. Раней на селектарнай нарадзе кіраўнік дзяржавы Аляксандр Лукашэнка ўказаў на шэраг важных задач і праблемных момантаў, за вырашэннем якіх неабходна ўзмацніць кантроль на ўсіх узроўнях і этапах. Як адзначыла Наталля Качанава, уборка ўраджаю — адзін з найважнейшых перыядаў у краіне, і ад яе поспеху залежыць шмат. І ў першую чаргу — харчовая бяспека. 

Старшыня Савета Рэспублікі нацэліла ўдзельнікаў нарады на актыўную работу на месцах: наведваць сельскагаспадарчыя прадпрыемствы, цікавіцца ходам уборачнай, нарыхтоўкай кармоў і прамежкавымі вынікамі, умовамі работы людзей, іх настроем. Пры гэтым яна падкрэсліла — тут не патрэбны справаздачы дзеля справаздач, гэта не кантроль, а магчымасць на сваім узроўні аказаць нейкую дапамогу, калі яна будзе неабходна.

Дапамога з уборкай ураджаю на прыватных падворках, фермерскім гаспадаркам, работа працоўных мігрантаў — на ўсё гэта дэпутаты ўсіх узроўняў павінны звяртаць увагу. Наталля Качанава яшчэ раз адзначыла: важна быць не проста староннім назіральнікам, а актыўна ўключацца ў гэтыя працэсы.

Як заявіў старшыня Магілёўскага абласнога Савета дэпутатаў, член Савета Рэспублікі Аляксандр Гарошкін, зараз вельмі важны час у жыцці дзяржавы, а таму заставацца ўбаку нельга. Задачы былі пастаўлены і канкрэтызаваны.

«У гэту работу павінны ўключацца ўсе на 100%. Так, нашы аграрыі сваю задачу ведаюць і разумеюць, яны старанна рыхтаваліся да сезона і цяпер ударна працуюць у палях. Наталля Іванаўна сёння канкрэтна і дакладна сказала аб задачах дэпутацкага корпуса. Мы можам арганізаваць работу ўсёй дэпутацкай вертыкалі, у дадзеным выпадку — у вобласці. Мы не кантралюючыя органы. Наша галоўная задача — бываць у працоўных калектывах і пры неабходнасці, калі патрэбна нейкая дапамога, гэта пытанне ўзнімаць перад выканаўчай уладай і аказваць усялякую іншую дапамогу і падтрымку», — сказаў ён.

Аляксандр Гарошкін выказаў упэўненасць у тым, што аграрыі рэгіёна справяцца з усімі пастаўленымі перад імі мэтамі. «А мы будзем у дапамогу, калі такая будзе неабходна», — падкрэсліў ён.

Пытанне аб працоўных мігрантах датычыцца любога рэгіёна, у тым ліку і Магілёўскай вобласці. «Мы цудоўна ведаем аб тым, што, на жаль, на некаторых прадпрыемствах ёсць пытанні з працоўнымі рэсурсамі. Таму адзін з выхадаў, які прапанаваны быў урадам, кіраўніком дзяржавы, — гэта прыцягненне працоўных мігрантаў, — расказаў Аляксандр Гарошкін. — Тут самае галоўнае — стварыць умовы для пражывання людзей, якія сюды прыедуць. Забяспечыць ім працу, ну і, адпаведна, кантраляваць яе ход. І я думаю, што пры выкананні ўсіх гэтых правіл і ад гэтага кірунку таксама павінен быць поспех».