Жыхарка ЖК «Мінск-Мір» расказала ў Threads пра насмешкі з боку супрацоўнікаў упраўлення па адукацыі Кастрычніцкага раёна, калі яна прыйшла туды па накіраванне ў дзіцячы сад для дзіцяці.

«Крык душы, вельмі засмучаная насмешкамі аддзела адукацыі дашкольнай. Была на прыёме. Мне ў твар смяяліся, што я папрасілася ў іншы сад, а менавіта найбліжэйшы каля дома. А не той, які мне далі за 30 хвілін ад дома. Месцы ёсць, але, напэўна, не для простых звычайных людзей», — напісала мінчанка і дадала, што, са слоў загадчыцы, у садзе ёсць месцы, што пацвярджае і інтэрактыўная карта ўстаноў дашкольнай адукацыі сталіцы.

«Ветка» выклікала рэзананс у сацсетцы (каля 140 тыс. праглядаў і больш за 150 каментарыяў). Карыстальнікі дзяліліся сваімі падобнымі гісторыямі, раілі абскардзіць рашэнне ўпраўлення і браніраваць свабоднае месца ў садзе праз партал электронных паслуг «Е-Паслуга».

У камітэце па адукацыі Мінгарвыканкама расказалі, што згаданая жанчынай інтэрактыўная карта партала «Адукацыя сталіцы» абнаўляецца кожны месяц. Аналіз даных інтэрактыўнай карты паказаў, што ў ДУА «Дзіцячы сад № 60 г. Мінска» на 3 жніўня было толькі два свабодныя месцы, а на момант звароту грамадзянкі 14 жніўня накіраванні ўжо былі выдадзены.

— Вызначальным фактарам пры камплектаванні дзіцячых садкоў з’яўляецца дата пастаноўкі дзіцяці на ўлік у мэтах атрымання ім дашкольнай адукацыі. Пры адсутнасці магчымасці даць месца дзіцяці ў бліжэйшы да месца пражывання дзіцячы сад накіраванне можа быць выдадзена ў дашкольную ўстанову, размешчаную ў тэрытарыяльных межах раёна, у зоне пешаходнага доступу альбо па ходзе руху грамадскага транспарту, што не супярэчыць заканадаўству, — растлумачылі спецыялісты, падзяліўшыся вынікамі аналізу камплектавання груп ва ўстановах дашкольнай адукацыі ЖК «Мінск-Мір».

У сітуацыі, якая склалася, мінчанцы прапанавалі разгледзець варыянт залічэння дзіцяці ў групы для дзяцей адпаведнага ўзросту ў ДУА «Дзіцячы сад № 484 г. Мінска» і ДУА «Дзіцячы сад № 262 г. Мінска» Ленінскага раёна, якія размешчаны ў непасрэднай блізкасці ад ЖК «Мінск-Мір».

У камітэце нагадалі, што пастаноўка на ўлік дзіцяці для вызначэння ў дзіцячы сад прадугледжана Указам Прэзідэнта Рэспублікі Беларусь ад 26.04.2010 № 200 (рэд. ад 25.02.2019) «Аб адміністрацыйных працэдурах, якія ажыццяўляюцца дзяржаўнымі органамі і іншымі арганізацыямі па заявах грамадзян» у службе «Адно акно» адміністрацый раёнаў г. Мінска. Камплектаванне дзіцячых садкоў ажыццяўляецца ўпраўленнямі па адукацыі адміністрацый раёнаў г. Мінска ў адпаведнасці з пастановай Міністэрства адукацыі ад 12 жніўня 2022 г. № 265 «Аб парадку ўліку дзяцей у мэтах атрымання імі дашкольнай адукацыі, спецыяльнай адукацыі на ўзроўні дашкольнай адукацыі» з унесенымі зменамі пастановай Міністэрства адукацыі ад 20 чэрвеня 2025 г. № 110.