На мінулым тыдні на палігоне Расійскай Федэрацыі Ашулук завяршыўся другі этап аператыўна-тактычнага вучэння ў складзе родаў войскаў ВПС і войскаў СПА Узброеных Сіл Рэспублікі Беларусь. І завяршыўся ён больш чым эфектна: баявыя разлікі 1-га зенітнага ракетнага палка, 377-га гвардзейскага зенітнага ракетнага палка і 15-й зенітнай ракетнай брыгады паспяхова выканалі баявыя пускі па мішэнях з ЗРК С-300 і «Тор-М2К», а баявыя разлікі 120-й зенітнай ракетнай брыгады выканалі пускі з ЗРК «Бук». Беларускія ваеннаслужачыя не пакінулі шанцу ўмоўнаму саперніку.

За дзеяннямі нашых вартавых неба назіралі начальнік Генеральнага штаба Узброеных Сіл — першы намеснік міністра абароны генерал-маёр Павел Муравейка, камандуючы Ваенна-паветранымі сіламі і войскамі супрацьпаветранай абароны генерал-маёр Андрэй Лук’яновіч.

Па-майстэрску і зладжана

Характэрна, што нашы зенітчыкі ўпершыню атрымалі магчымасць праверыць свае навыкі ў супрацьстаянні з «Санатай». Мішэнны комплекс «Саната» — гэта сучасная распрацоўка, прызначаная для імітацыі шырокага спектра паветраных пагроз. Ён здольны прайграваць траекторыі і манеўры сучасных сродкаў нападу, якія дзейнічаюць у шырокім дыяпазоне вышынь і на дагукавых хуткасцях. Па сваіх характарыстыках «Саната» мае істотнае падабенства з брытанскай крылатай ракетай Storm Shadow, што дазваляе максімальна рэалістычна мадэляваць умовы сучаснага паветранага бою.

За тыдзень, які правёў аўтар гэтых радкоў на Ашулуку бок у бок з вартаўнікамі неба, давялося пераканацца: кожны з іх адносіцца да выканання вучэбна-баявых задач з усёй сур’ёзнасцю. Ды і ў прафесіяналізме кожнага вайскоўца, зладжанасці разлікаў сумненняў быць не можа.

У прыватнасці, майстэрства і зладжанасць прадэманстравалі нашы вайскоўцы пры выкарыстанні ЗРК «Тор-М2К». Гэтыя баявыя машыны вядомыя сваёй мабільнасцю і эфектыўнасцю. «Торы» паказалі сябе ў справе, здзяйсняючы пускі ў руху і забяспечваючы прыкрыццё манеўраў зенітнага ракетнага комплексу С-300. Такая каардынацыя і аператыўная гатоўнасць сведчаць аб высокім узроўні падрыхтоўкі асабовага складу і якасці ваеннай тэхнікі. Сістэма «Тор-М2К» не толькі абараняла больш дальнабойныя С-300 ад патэнцыяльных пагроз з паветра, але і прадэманстравала сваю здольнасць хутка адаптавацца да зменлівых умоў бою.

Пачын калег падтрымалі і вайскоўцы 1-га зенітнага ракетнага палка, 377-га гвардзейскага зенітнага ракетнага палка і 120-й зенітнай ракетнай брыгады. На поспех вучэбна-баявой работы беларускай групоўкі зенітных ракетных войскаў не паўплывалі ні змяненне мішэннай абстаноўкі, ні змена баявых разлікаў. Дзякуючы ўмелым дзеянням нашых вайскоўцаў неба над Астраханскім палігонам было зачышчана.

«Галоўная мэта — забеспячэнне мірнага неба над Беларуссю»

Генерал-маёр Павел Муравейка паразмаўляў з журналістамі пасля баявых пускаў на палігоне Ашулук:

— Вучэнне мела цэлы комплекс новых метадычных прыёмаў, у рамках якіх адпрацавалі самыя сучасныя варыянты адбіцця ўдараў сродкаў паветранай атакі. У прыватнасці, нашы комплексы «Тор» упершыню адпрацавалі пускі баявых ракет у руху і ў начных умовах. Хлопцы зрабілі гэта вельмі якасна, і ўсе баявыя задачы імі былі вырашаны.

Акрамя таго, у рамках вучэння выпрабавалі і апрабавалі варыянты дзеянняў мабільных агнявых груп па беспілотных авіяцыйных комплексах, якія ажыццяўлялі налёт на нашы падраздзяленні. Мабільныя агнявыя групы паказалі высокую эфектыўнасць і забяспечылі паражэнне беспілотных авіяцыйных комплексаў з дастаткова высокай дакладнасцю.

Кіраўнік вучэння — намеснік камандуючага ВПС і войскамі СПА палкоўнік Міхаіл Матросаў застаўся задаволены дзеяннямі беларускіх вайскоўцаў на расійскім палігоне Ашулук.

«Любое наша вучэнне абумоўлена тым ваенна-палітычным становішчам, якое склалася вакол нашай краіны, — заўважыў ён. — Галоўная мэта Узброеных Сіл, у прыватнасці, ВПС і войскаў СПА, — забеспячэнне мірнага неба над Беларуссю»

Вучэнні адрозніваліся высокай інтэнсіўнасцю і прымяненнем новых тыпаў мішэняў, якія раней не выкарыстоўваліся. Адмысловая ўвага аддавалася супрацьборству з беспілотнымі лятальнымі апаратамі, такімі як «Дэльта». 

Эфектыўнасць комплексаў была пацверджана на практыцы. Баявыя разлікі паспяхова справіліся з пастаўленымі задачамі, дзейнічаючы ў складаных умовах. Паветраная абстаноўка была максімальна набліжана да рэальнай баявой, з мінімальнымі часовымі інтэрваламі паміж з’яўленнем мішэняў. Гэта дазволіла разлікам аператыўна ацэньваць сітуацыю і прымаць рашэнні. Папярэднія вынікі вучэнняў ацэньваюцца станоўча, а дэталёвы аналіз будзе праведзены пасля вяртання ў пункты пастаяннай дыслакацыі.

Алег НЯКАЛА
Фота аўтара