Плантацыі тут цягнуцца ад падножжа гор да самага ўзбярэжжа мора, а іх агульная плошча перавышае 2,4 тысячы гектараў. Ананасы, вырашчаныя ў Лунгуне, вызначаюцца адсутнасцю цвёрдых валокнаў, іх мякаць мяккая і цалкам ядомая. Такі плод не трэба вымочваць у салёнай вадзе — досыць проста ачысціць і атрымліваць асалоду ад смаку.

Сакрэт выключнай якасці крыецца ва ўнікальнай глебе. Чырвоныя суглінкі багатыя на селен, яны валодаюць найвышэйшай паветрапранікальнасцю і вільгацяёмістасцю. Марскі брыз і багацце сонца давяршаюць працэс: плады выспяваюць незвычайна салодкімі і духмянымі.

Гісторыя вырошчвання ананасаў у Лунгуне налічвае больш за 40 гадоў, аднак сапраўдны прарыў адбыўся дзякуючы мясцоваму фермеру Цзэн Цаю. У 2019 годзе ён заклаў першыя 3,33 га плантацый з новымі сартамі, паступова пашырыўшы іх да звыш 166 га. Яго поспех натхніў суседзяў.

Сёння ананасавым бізнесам займаюцца 80% хатніх гаспадарак пасёлка, а вытворчасць ахоплівае 11 вёсак. Чакаецца, што сукупны аб’ём вытворчасці па ўсім ланцужку сёлета перавысіць 625 млн юаняў. Цяпер Лунгунь пастаўляе дзве трэці ўсіх ананасаў правінцыі Хайнань і экспартуе прадукцыю.

Мясцовыя прадпрымальнікі не абмяжоўваюцца продажам свежых пладоў. На перапрацоўчым прадпрыемстве «Чуцуан» з ананасаў робяць сушаныя чыпсы. Дзякуючы такой перапрацоўцы кошт прадукту ўзрастае ўдвая, дасягаючы 70 юаняў за кілаграм. У планах — запуск вытворчасці ананасавага пюрэ і знакамітага печыва з ананасавым начыннем «фэнлісу».

Развіццё галіны вырашыла праблему занятасці: жыхарам навакольных вёсак больш не трэба з’язджаць на заробкі ў гарады. Вопытны зборшчык або сартавальнік у сезон зарабляе 400-500 юаняў у дзень.

Паралельна ў рэгіёне актыўна развіваецца агратурызм. Уздоўж кальцавой дарогі вострава пракладзены тэматычны «ананасавы» маршрут, будуюцца гасцявыя дамы, а традыцыйны штогадовы ананасавы карнавал прыцягвае мноства гасцей.