Рэспубліканскі турнір аб’яднаў больш за 20 спартсменаў з Беларусі і Расіі. Спаборніцтвы пачаліся ўчора (адбыліся трэніроўкі і кваліфікацыя), а сёння — парныя заезды.

Пілот з Мінска Віталь Слабодскі падзяліўся, што прыйшоў у аўтаспорт тры гады таму. «Аўтамабілі мне былі цікавы з дзяцінства, але даведаўся аб тым, што існуюць такія спаборніцтвы і што ёсць дрыфты, можна прыехаць на трэніроўку і афіцыйна паспрабаваць свае навыкі кіравання, тры гады таму, таварыш расказаў, і я вырашыў паспрабаваць. Да гэтага глядзеў па тэлевізары і думаў, што гэта недзе там і нерэальна наогул. У мінулым годзе ў чэмпіянаце Беларусі я заняў першае месца ў другім дывізіёне па выніках сезона. Стараюся, адношуся да гэтага з вялікай адказнасцю як да прафесійнага спорту і аддаюся поўнасцю», — расказаў ён, дадаўшы, што дрыфт — гэта магчымасць перазагрузіцца. «Я прадпрымальнік, шмат працую. І магчымасць пераключацца з работы на спорт дае магчымасць быць больш прадукцыйным у бізнесе, атрымліваць там больш вынікаў для таго, каб забяспечыць сабе хобі», — адзначыў Віталь Слабодскі.

«У Гродне ездзіць даводзілася, але гэта было або на грамадскім транспарце, або на грамадзянскім аўтамабілі. А што датычыцца гэтай лакацыі і выкарыстання цэнтральнай часткі горада ў спартыўных мэтах, гэта ўпершыню, напэўна, не толькі для мяне, а для большасці пілотаў, якія наогул прысутнічаюць тут. Гэта новая гісторыя для Беларусі. Першаадкрывальнікамі былі тут тыя, хто здымаў цікавы фільм з прыцягненнем замежных пілотаў і галівудскіх артыстаў. А вось нам, простым пілотам Беларусі, даводзіцца гэта ўпершыню. Лакацыя цікавая і незвычайная. З-за нюансаў гэтай трасы цікава і самому пілоту, і гледачам», — адзначыў ён.

Прыехаў з Браслава ў Гродна паназіраць за тым, як развіваюцца падзеі турніру, Вадзім Карпухін. «Дамаўляліся аб сустрэчы з сябрамі, якія жывуць у Гродне, і вырашылі сумясціць. Як, напэўна, і многім хлопцам, мне падабаюцца машыны. А дрыфт — гэта вельмі відовішчны від аўтаспорту. Роў матораў, шмат дыму, гучныя адстрэлы — агонь. Я, дарэчы, спрабаваў дрыфціць, брат падарунак такі зрабіў, таму ёсць разуменне складанасці працэсу. На спаборніцтвах падобных бываў, але яны часцей на аўтадромах праходзяць. А тут дрыфт у цэнтры горада, ды яшчэ ў якім я вучыўся, — прыгажосць», — расказаў ён, дадаўшы, што марыць пабываць на расійскай дрыфт-серыі.

Сцяпан Голікаў прыехаў у Гродна з Мінска. «Такія спаборніцтвы — гэта заўсёды прыгожыя машыны. Мы бывалі ў Стайках на такіх турнірах, а тут — цэнтр горада, вуліцы, па якіх я ездзіў, — вельмі крута і цікава на гэта паглядзець. Парныя заезды мяне больш за ўсё цікавяць. Дым з-пад колаў, пах асаблівы — свая атмасфера на такіх мерапрыемствах, — адзначыў ён. — Дарэчы, вельмі спадабаўся ролік, які здымалі ў Беларусі аб дрыфце. Графіка, здымка крутая, задума ў цэлым. Цяпер жа магу паглядзець на такое ў рэальнасці. Атмасфера крутая».