Таварыства з абмежаванай адказнасцю «Марскія сезоны» было створана для рэалізацыі інвестыцыйнага праекта «Узвядзенне рыбаперапрацоўчага прадпрыемства на тэрыторыі СЭЗ «Віцебск». Яно будзе займацца перапрацоўкай і кансерваваннем рыбы, ракападобных і малюскаў.
— Мяркуючы па тым, якія тут закладзены тэхналагічныя рашэнні і прыняты кірункі ў развіцці і стратэгіі ўдасканальвання, прадукцыя знойдзе водгук у нашага пакупніка, — адзначыў на цырымоніі адкрыцця старшыня аблвыканкама Павел Муравейка. — Стварэнне такога прадпрыемства не што іншае, як барацьба за нашу прамысловую і харчовую бяспеку. Таму што сёння, калі ў свеце дамініруе нядобрасумленная канкурэнцыя, вырашэнне задач шляхам ціску, санкцый і іншага, стварэнне такога самастойнага прадпрыемства, якое забяспечыць і Беларусь, і Расію сучаснай прадукцыяй, якая сапраўды запатрабаваная і смачная, для нашага спажыўца вельмі важна.


Інвестыцыйная фаза праекта ахоплівала 2022 — 2026 гады. Як і планавалася, пачатак вытворчай дзейнасці прыпаў на 4-ы квартал бягучага года. На поўную праектую магутнасць прадпрыемства выйдзе ў 2028-м.
З пачатку дзейнасці створана 744 працоўныя месцы, у тым ліку 428 на вытворчай пляцоўцы ў Віцебску, якая была набыта ў лютым гэтага года. Пры выхадзе аб’екта на поўную магутнасць агульная колькасць новых месцаў складзе каля 1 тысячы.
Сыравіну плануюць набываць у расійскіх прадпрыемстваў, якія займаюцца прамысловым вылавам дзікай марской рыбы каштоўных парод. Асноўная сыравіна: мінтай, фарэль, селядзец, ікра мойвы і селядцу, морапрадукты. Аб’ёмы складскіх памяшканняў дазваляюць захоўваць каля 5 тысяч тон сыравіны і 2,5 тысячы тон гатовай прадукцыі.


Вытворчая праграма прадугледжвае наступны наменклатурны пералік: марожаная рыбная прадукцыя, ахалоджаная фарэль без галавы, прэсэрвы з рыбы, а таксама вырабы з морапрадуктаў у соусах і заліўках, пастэрызаваня рыбная прадукцыя, ікорныя вырабы. Магутнасці прадпрыемства дазваляюць вырабляць да 110 тон гатовай прадукцыі ў суткі.
Акрамя насычэння харчовага рынку Беларусі прадукцыяй з натуральнай дзікай рыбы, новая вытворчасць будзе садейнічаць імпартазамяшчэнню падобных тавараў, росту экспарту — звыш 90 % прадукцыі плануюць рэалізоўваць за межы краіны — і паляпшэнню сальда плацежнага балансу.
Святлана ЯКАЎЛЕВА, фота прадастаўлена ТАА «Марскія сезоны»