У 2021-2025 гадах былі закладзены асновы па рассяленні зуброў, у тым ліку таму, што іх колькасць значна вырасла — сёння ў Беларусі налічваецца больш за 3 тыс. асобін. «Яны сканцэнтраваны ў буйных лакальных і даволі шматлікіх папуляцыях — Белавежская, Асіповіцкая, дзе ўжо больш як па 700 асобін знаходзяцца. Гэта даволі кансерватыўныя жывёлы, якія рассяляюцца вельмі павольна і канцэнтруюцца на невялікіх тэрыторыях, што стварае праблемы, у тым ліку для сельскай гаспадаркі. Таму яны патрабуюць рассялення. У гэту пяцігодку ўжо закладзены яго асновы, напрыклад, па стварэнні новай папуляцыі зуброў у Чэрыкаўскім лясгасе», — расказаў Аляксандр Казарэз.

Чэрыкаўскі раён быў выбраны не выпадкова. Там вельмі шмат зямель, якія пацярпелі ад аварыі на Чарнобыльскай АЭС, — адселеныя, малапрыдатныя землі, якія зарастаюць бур’яном. «Адзін з метадаў барацьбы з гэтай экалагічнай праблемай, а таксама праблемай біяразнастайнасці — натуральны выпас. Таму гэты рэгіён і быў выбраны для таго, каб рассяляць зуброў», — растлумачыў прадстаўнік Мінлясгаса. Акрамя таго, угоддзі раёна спрыяльныя для гэтага віду капытных.