У «Світанку» цэлы год праходзяць лячэнне, аздараўленне, сацыяльна-псіхалагічную рэабілітацыю і вольны час дзеці і падлеткі, якія пражываюць на пацярпелых у выніку аварыі на Чарнобыльскай АЭС тэрыторыях. У цэнтры таксама арганізаваны вучэбна-выхаваўчы працэс.
«Адкрыццё новых аб’ектаў у жыцці нашай краіны — заўсёды знакавыя падзеі. Ганарымся, што праводзім у краіне такую сацыяльную палітыку, якая накіравана перш за ўсё на чалавека. Пра гэта заўсёды кажа Прэзідэнт Аляксандр Лукашэнка, — сказала Наталля Качанава. — Зусім нядаўна мы ўспаміналі чарнобыльскую трагедыю, якая прыйшла на нашу зямлю 40 гадоў таму. Гэтая бяда здавалася тады сур’ёзнай, складанай, цяжкай. Прэзідэнт прымаў правільныя рашэнні, наша краіна дзейнічала абсалютна выверана. Жыццё паказала: праз 40 гадоў гэтыя тэрыторыі жывуць — жывуць людзі, нараджаюцца дзеці, ствараюцца сем’і, працуюць прадпрыемствы. І, вядома, робіцца ўсё для таго, каб нашы людзі былі здаровыя».
Старшыня Савета Рэспублікі звярнула ўвагу, што ў Беларусі функцыянуе сетка дзіцячых аздараўленчых цэнтраў, дзе дзеці могуць адпачыць і ўмацаваць здароўе. Наталля Качанава падзякавала персаналу «Світанка» за нялёгкую працу, іх работу з дзецьмі, уклад у выхаванне будучага пакалення. Яна ўручыла сертыфікат на абсталяванне сэнсарнага пакоя ў абноўленым цэнтры.
У сувязі з вялікай запатрабаванасцю аздараўленчых паслуг у «Світанку» ў канцы 2023 года пачалі будаваць спальны корпус на 150 месцаў. На першым паверсе размясціліся жылыя блокі, буфет, медыцынскія кабінеты, бытавыя і службовыя памяшканні. Другі паверх займаюць жылыя блокі і пакоі дзённага знаходжання, трэці — жылыя блокі, пакоі дзённага знаходжання, пакоі адпачынку, хол-рэкрэацыя. Работы на аб’екце вяліся па дзяржаўнай праграме пераадолення наступстваў аварыі на Чарнобыльскай АЭС.
«Будаўнікі выканалі работы за кароткі тэрмін, стварыўшы ўсе неабходныя ўмовы, каб дзеці маглі аздаравіцца, працягнуць навучанне. Вельмі важна, што ёсць магчымасць для адпачынку маленькіх дзяцей са сваімі бацькамі», — адзначыў старшыня Брэсцкага аблвыканкама Пётр Пархомчык. Ён уручыў дзіцячаму рэабілітацыйна-аздараўленчаму цэнтру сертыфікат на халадзільнік баранавіцкай вытворчасці.
Дырэктар Рэспубліканскага цэнтра па аздараўленні і санаторна-курортным лячэнні насельніцтва Генадзь Балбатоўскі падкрэсліў, што на працягу 40 гадоў у Беларусі ўкладваюцца каласальныя сродкі ў ліквідацыю наступстваў чарнобыльскай аварыі, аднаўленне зямель, аздараўленне насельніцтва. Дзеці, якія пражываюць на забруджаных тэрыторыях, могуць цалкам бясплатна праходзіць лячэнне і аздараўленне ў аздараўленчых цэнтрах. Беларусь у гэтым пытанні напрацавала вялікі вопыт, які выкарыстоўваюць іншыя краіны.
Гэтым летам спаўняецца 30 гадоў з моманту адкрыцця дзіцячага рэабілітацыйна-аздараўленчага цэнтра «Світанак».
