Будаўніцтва новага корпуса РНПЦ дзіцячай анкалогіі набліжаецца да завяршэння. У цяперашні час работы вядуцца адначасова на ўсіх паверхах будынка. На аб’екце задзейнічаны больш за 130 спецыялістаў: маляры, цесляры, электрыкі, сантэхнікі і работнікі спецыялізаваных арганізацый. Агульная гатоўнасць корпуса складае каля 90%. Пры гэтым трэба будзе выканаць яшчэ значны аб’ём работ.

Унутры завяршаецца ўстаноўка чыставой электрыкі і сантэхнікі, кладка гамагеннага пакрыцця, вядуцца малярныя работы. У «чыстых» памяшканнях сцены ўжо ў HPL-панэлях, ідзе мантаж падвесных столяў і ўладкаванне кансоляў. Паралельна завозіцца і манціруецца абсталяванне, расстаўляецца мэбля.

Новы корпус злучаецца з дзеючым будынкам падземным пераходам і паветранай галерэяй. Будаўнікам трэба будзе выканаць неабходныя ўрэзкі. У надземнай пераходнай галерэі, размешчанай на ўзроўні пятага паверха, зараз манціруюць вітражы.

Актыўна вядуцца работы і на прылеглай тэрыторыі. Завяршаецца ўладкаванне ўваходных груп і ганкаў, укладваецца тратуарная плітка, фарміруюцца газоны і ўладкоўваюцца парковачныя месцы. 

У новым корпусе РНПЦ размесцяцца аддзяленне трансплантацыі на 12 ложкаў, сучасны аперацыйны блок з чатырма аперацыйнымі, аддзяленне анестэзіялогіі і рэанімацыі з палатамі інтэнсіўнай тэрапіі, кансультатыўна-паліклінічнае аддзяленне, навуковыя лабараторыі і вучэбная кафедра.

Будаўніцтва медыцынскага аб’екта вядзе Будтрэст № 35. Генеральным падрадчыкам выступае філіял СУ-201. Сярод рэалізаваных праектаў арганізацыі — карпусы Мінскага цэнтра хірургіі, транспланталогіі і гематалогіі, а таксама 5-й, 10-й і 11-й гарадскіх бальніц.