Гэтай суботняй раніцай калектыў Камітэта дзяржкантролю на чале са старшынёй Васілём Герасімавым далучыўся да пасадкі лесу ў Калодзішчанскім лясніцтве Бараўлянскага спецлясгаса. На ўчастку 4 га былі высаджаны саджанцы сасны і елкі.

«Сваёй працай прадстаўнікі Камітэта дзяржкантролю ўносяць уклад у захаванне лесу. На гэтым месцы прайшоў ураган, быў буралом. Сёння мы высадзілі саджанцы сасны і елкі. Упэўнены, праз некалькі гадоў тут вырасце новы сасновы лес», — адзначыў Васіль Герасімаў.

Кіраўнік КДК таксама падкрэсліў, што акцыя становіцца сямейнай. Многія работнікі ведамства прыехалі разам з дзецьмі. «Гэта дарагога варта. Калі робіш сваімі рукамі, то і ставішся да гэтага больш беражліва», — акцэнтаваў ён.

Традыцыйна супрацоўнікі КДК двойчы ў год удзельнічаюць у пасадцы лесу. Сёння яны працавалі не толькі побач з Мінскам — у розных лясніцтвах пасадкай займаліся работнікі абласных камітэтаў дзяржкантролю.

Акрамя таго, прадстаўнікі цэнтральнага апарату КДК таксама дапамагалі ў добраўпарадкаванні аднаго са сталічных паркаў, дзе ачышчалі тэрыторыю ад смецця, галін і лісця.