Як адзначыў старшыня гарвыканкама, сёння Гродна — трэці горад у краіне па колькасці жыхароў. У абласным цэнтры налічваецца 363 тыс. жыхароў. Гарадскія ўлады робяць усё магчымае, каб ствараць і падтрымліваць прывабныя ўмовы для жыцця і працы людзей. Гэта камфортнае жыллё, гарадское асяроддзе, інфраструктура, належная заработная плата. Пры гэтым у планах развіцця горада ўлічваецца, што ў міграцыйным патоку пераважае моладзь.

«Як сказаў наш Прэзідэнт, Гродна — горад-прыгажун. Разам з тым гэта горад-будоўля. Адначасова ў нас узводзяцца некалькі новых мікрараёнаў, будаўніцтва жылля вядзецца як на пляцоўках ва ўжо абжытай частцы Гродна, так і на новых тэрыторыях, пашыраючыся з боку мікрараёнаў Грандзічы, Паўднёвы, Альшанка, — распавёў старшыня гарвыканкама. — Што тычыцца Паўднёвага, то тут сёння ўжо актыўна вядзецца забудова — абноўленая дарожная інфраструктура дазваляе гэта рабіць. Сучасны мікрараён узводзіцца на вуліцы Вясновай і абяцае стаць адным з самых папулярных у Гродне. Шматкватэрныя жылыя дамы будуюцца на вуліцы Астроўскага, паблізу гістарычнага цэнтра: аблічча будынкаў тут упісваецца ў стылістыку гэтай часткі старадаўняга горада. Практычна завершана забудова мікрараёна Фолюш на тэрыторыі, прылеглай да ракі Ласасянкі. У тым ліку там ёсць шэраг аб’ектаў, прызначаных для продажу інвестарам. А на месцы, дзе раней знаходзіліся неўзаконеныя гаражы і дачы, плануецца стварыць парк адпачынку для жыхароў. Цяпер распрацоўваецца праект, пасля чаго ён будзе вынесены на грамадскае абмеркаванне».

Як расказаў Андрэй Хмель, у блізкай перспектыве стануць значна больш прывабнымі і «ўязныя вароты» ў Гродна з боку Мінска: зменіцца мікрараён Панямунь, які будзе мець вельмі прэзентабельны выгляд. Тут вырастуць вышынныя дамы з вялікай плошчай шклення, будзе арганізавана прыгожае падсвятленне будынкаў. На ўездзе ўзводзіцца і новы спарткомплекс. 

«Плануем, што да юбілею горада гэтыя „ўязныя вароты“ будуць цалкам гатовыя сустракаць гасцей», — рэзюмаваў старшыня гарвыканкама.