Паводле слоў Аляксандра Церахава, асноўны ўпор зроблены на павелічэнне аб’ёмаў жыллёвага будаўніцтва, прычым не за кошт Мінска, а дзякуючы развіццю малых гарадоў і аграгарадкоў. «У структуры жылля прыярытэт аддаецца будаўніцтву для шматдзетных сем’яў і маючых патрэбу ў жыллі грамадзян. Асобная ўвага надаецца арэнднаму жыллю, якое павінна ўзводзіцца там, дзе ствараюцца рабочыя месцы і дзе неабходна замацаванне кадраў», — упэўнены ён. 

Калі жыллё пабудавана, яго трэба якасна абслугоўваць. «Людзі хочуць бачыць добраўпарадкаваныя двары, добрыя дарогі, зручныя пад’езды да дома і месца працы. Менавіта таму дарожнае будаўніцтва і рамонт аўтамабільных дарог становяцца другой прыярытэтнай задачай для ўрада і рэгіёнаў», — падкрэсліў віцэ-прэм’ер.

Трэці кірунак — павышэнне якасці жыллёва-камунальных паслуг. «Асаблівая ўвага надаецца якаснаму водазабеспячэнню. За апошнія гады ў краіне праведзена вялікая работа, і засталося зусім няшмат, каб чыстая вада была ў кожным доме, асабліва ў сельскіх населеных пунктах. Важную ролю адыгрывае капітальны рамонт жыллёвага фонду: па выніках 2025 года колькасць зваротаў грамадзян па пытаннях ЖКГ значна знізілася дзякуючы выбудаванай сістэмнай рабоце, калі кожны жыхар ведае тэрміны рамонту свайго дома і бачыць, што абяцанні выконваюцца», — заўважыў Аляксандр Церахаў

Ёсць і зоны росту: якасная прыборка пад’ездаў, добраўпарадкаванне двароў. «Тут важная дапамога саміх жыхароў — стварыць прыгажосць вакол сябе, паказаць дзецям, як вырошчваць кветкі, уладкоўваць клумбы. Клопат аб сваім двары, аб сваім кутку Радзімы — гэта ўклад кожнага ў агульны дабрабыт», — сказаў ён.

Асобны кірунак — транспартнае абслугоўванне. «Першачарговая задача — звязаць якасным транспартам гарады-спадарожнікі з Мінскам і абласнымі цэнтрамі. Важна, каб з любога аграгарадка можна было дабрацца да раённага цэнтра, а адтуль хутка і камфортна да абласнога цэнтра або сталіцы, туды, дзе гэта неабходна чалавеку», — звярнуў увагу віцэ-прэм’ер.

Механізмы развіцця могуць быць рознымі: развіццё гарадскіх транспартных ліній, мадэрнізацыя чыгункі, стварэнне мультымадальных маршрутаў, калі зручны транспарт дастаўляе пасажыра да станцыі метро або канцавога прыпынку. Паводле яго слоў, таксама перахопліваючыя паркоўкі дапамогуць разгрузіць горад: прыехаў, пакінуў машыну на ўездзе ў горад і далей на грамадскім транспарце.

Перспектыўным выглядае развіццё авіязносін. «Прамыя рэйсы ўжо звязалі Беларусь з многімі краінамі, зрабіўшы свет больш даступным для беларусаў. Важна развіваць менавіта тыя прамыя напрамкі, якія запатрабаваныя людзьмі. Не варта забываць і аб унутрырэгіянальных авіярэйсах — такі вопыт паспяхова існаваў у савецкі час і мог бы быць запатрабаваны сёння», — сказаў ён.

Беларусь — краіна рэк, і развіццё рачнога транспарту, у тым ліку будаўніцтва сучасных суднаў, таксама ўяўляе цікавасць і можа стаць новым кірункам развіцця, адзначыў Аляксандр Церахаў. 

«Усе гэтыя задачы стаяць перад урадам. Работа будзе будавацца на выніках, якія людзі павінны бачыць тут і цяпер. Кожны жыхар краіны павінен убачыць рэальныя паляпшэнні ў сваім паўсядзённым жыцці», — рэзюмаваў новы віцэ-прэм’ер.

Да цяперашняга часу Аляксандр Церахаў займаў пасаду генеральнага дырэктара дзяржаўнага вытворчага аб’яднання «Мінскбуд». А да гэтага на працягу шэрагу гадоў узначальваў Міністэрства жыллёва-камунальнай гаспадаркі.