Вітаючы прысутных, старшыня Белстата Іна МЯДЗВЕДЗЕВА акцэнтавала ўвагу на асаблівай сімвалічнасці бягучага года. «Тры дзесяцігоддзі стварэння адзінай статыстычнай прасторы дзвюх краін, — канкрэтызавала яна. — За гэтыя гады плённай працы пройдзены каласальны шлях, а ўсе нашы дасягненні на гэтым шляху сталі магчымыя дзякуючы ўзаемнай павазе і гатоўнасці ісці насустрач адзін аднаму — гэта значыць, добрым і канструктыўным партнёрскім адносінам паміж Белстатам і Расстатам».

Старшыня Белстата асабліва вылучыла стратэгічную значнасць дзейнасці Статыстычнага савета ў кантэксце функцыянавання Саюзнай дзяржавы. «Максімальная супастаўнасць якаснай статыстычнай інфармацыі з’яўляецца фундаментальнай асновай для фарміравання адзінай эканамічнай прасторы і рэальнай ацэнкі развіцця інтэграцыйных працэсаў», — заявіла Іна Мядзведзева. Яна выказала ўпэўненасць у тым, што работа, якая праводзіцца ў сценах гэтага гістарычнага замка, паслужыць далейшаму ўмацаванню беларуска-расійскіх адносін і паглыбленню гарманізацыі статыстычных працэсаў у нашых краінах.

Падчас двухдзённага пасяджэння Савета ў Нясвіжскім замку ўдзельнікі абмяркоўваюць мадэрнізацыю афіцыйнай статыстыкі, інтэграцыю даных з альтэрнатыўных крыніц у статыстычную вытворчасць на прыкладзе мабільнага пазіцыянавання, рэгіянальнае супрацоўніцтва, а таксама падрыхтоўку да правядзення перапісу насельніцтва і сельскагаспадарчага перапісу раунда 2030 года.

У першы дзень работы Савета адбылося падвядзенне вынікаў рэалізацыі Плана сумесных мерапрыемстваў Белстата і Расстата па забеспячэнні супастаўнасці ў галіне статыстычнай метадалогіі на 2024-2026 гады. Старшыня Белстата адзначыла, што 75 % мерапрыемстваў Плана ўжо выканана і бакамі дасягнуты істотны прагрэс у галіне гарманізацыі сістэмы статыстычнага ўліку, уніфікацыі метадалогіі разліку і забеспячэння супастаўнасці ключавых статыстычных паказчыкаў.

«Статыстычныя службы Беларусі і Расіі пацвердзілі прымяненне адзіных прынцыпаў пабудовы статыстычных сістэм, заснаваных на міжнародных стандартах, у тым ліку тыпавых мадэлях ААН, — падкрэсліла Іна Мядзведзева. — Бясспрэчнымі перавагамі інтэграцыі ў статыстыку альтэрнатыўных катэгорый дадзеных выступаюць зніжэнне нагрузкі на бізнэс і бюджэт, а таксама павышэнне разнастайнасці інфармацыі». 

Для абедзвюх статыстычных службаў «прынцып паўторнага выкарыстання дадзеных» з’яўляецца ключавым. Улічваючы глабальныя трэнды на такую інтэграцыю, беларускія і расійскія службы абмяняліся існуючымі нарматыўнымі дакументамі, якія даюць паўнамоцтвы доступу да альтэрнатыўных крыніц даных, а таксама вопытам сістэматызацыі і ацэнкі іх якасці. 

Кіраўнік Белстата асобна вылучыла сумесную работу па распрацоўцы агрэгаваных статыстычных паказчыкаў Саюзнай дзяржавы. «Бакі ўзгаднілі метадалогію правядзення гадавых супастаўленняў валавога ўнутранага прадукту Беларусі і Расіі і пачалі разлікі, — адзначыла кіраўнік ведамства. — Так, паводле даных за 2025 год, ВУП Саюзнай дзяржавы склаў 6,9 трлн. беларускіх рублёў па парытэце пакупной здольнасці (ППЗ), што эквівалентна 223,5 трлн. расійскіх рублёў па ППС».

Важным вынікам першага дня пасяджэння стала падпісанне Плана сумесных мерапрыемстваў Белстата і Расстата па забеспячэнні супастаўнасці ў галіне статыстычнай метадалогіі на 2027-2029 гады, у якім вызначаны стратэгічныя напрамкі ў сумеснай рабоце на наступны трохгадовы перыяд.

Вераніка КАНЮТА

Фота прэс-службы Белстата