Абвінавачаны, знаходзячыся ў стане моцнага алкагольнага ап’янення, вяртаўся дадому. Праходзячы па двары на вул. Бельскага, ён убачыў прыпаркаваны аўтамабіль Toyota Auris. Мужчыну здалося, што ў салоне знаходзіцца яго знаёмая з нейкім мужчынам, і ён вырашыў яе правучыць.

Узяўшы дома біту, зламыснік вярнуўся да машыны і нанёс не менш за чатыры ўдары па лабавым шкле, люстэрку задняга віду і кузаве, прычыніўшы аўтаўладальніку шкоду на агульную суму 830 рублёў.

Неўзабаве хулігана затрымалі, у дачыненні да яго распачалі крымінальную справу. Жанчына, якая нібыта падалася абвінавачанаму, каля двух гадоў знаходзіцца ў хоспісе.

— Абвінавачаны халасты, з 2014 года нідзе афіцыйна не працаўладкаваны, раней прыцягваўся да крымінальнай адказнасці за ўчыненне аналагічнага злачынства, судзімасць пагашаная, — пракаментаваў намеснік пракурора Фрунзенскага раёна Андрэй Сербун. — Яму выстаўлена абвінавачванне ў наўмысных дзеяннях, якія груба парушаюць грамадскі парадак і выказваюць відавочную непавагу да грамадства, што суправаджаюцца пашкоджаннем чужой маёмасці (хуліганствам), гэта значыць ва ўчыненні злачынства, прадугледжанага ч. 1 арт. 339 КК. Віну грамадзянін цалкам прызнаў, прычыненую пацярпеламу шкоду добраахвотна кампенсаваў. Паводле заключэння экспертаў, ён мае патрэбу ў прымусовым лячэнні ад хранічнага алкагалізму.

У дачыненні да мінчаніна ўжытая мера стрымання ў выглядзе заключэння пад варту.