Паводле слоў начальніка галоўнага ўпраўлення сацыяльнага партнёрства і працоўных адносін Федэрацыі прафсаюзаў Беларусі Дзмітрыя Аляксейчыка, грамадзяне актыўна звяртаюцца ў прафсаюзныя грамадскія прыёмныя і задаюць свае пытанні па рабоце гандлёвых аб’ектаў і тавараў, якія імі рэалізуюцца. Адпрацоўваецца кожны зварот, як правіла, з выездам на месца. Трэба адзначыць, што адміністрацыі магазінаў ідуць насустрач і выконваюць рэкамендацыі прадстаўнікоў прафсаюзаў у частцы ліквідацыі выяўленых парушэнняў.

• Напрыклад, спажывец з Мінска паскардзіўся ў грамадскую прыёмную, што ў магазіне, які ён часта наведвае, у продажы стала менш дзіцячага малака пэўнага вытворцы. Прафсаюзны спецыяліст пагаварыў і з таваразнаўцам магазіна, і з сектарам продажаў вытворцы. Як высветлілася, тавар паступае ў гандлёвую кропку паводле зацверджаных заявак. Акрамя таго, у магазіне ў вялікім асартыменце прадстаўлена дзіцячае малако і іншых айчынных вытворцаў. Разам з тым, адміністрацыя крамы прыняла да ўвагі пажаданне жыхара мікрараёна сталіцы — у бліжэйшы час плануецца павялічыць колькасць гэтага віду прадукцыі.

З нараканнем звярнулася яшчэ адна жыхарка Мінска, якая набыла ў магазіне свіную выразку з часткай нізкагатунковага мяса. Прадстаўнік прафсаюза выехаў у гандлёвы аб’ект для высвятлення ўсіх абставін. Загадчык магазіна растлумачыў, што гэта прадукцыя паступае ў продаж ужо ў разабраным выглядзе. Далей адбылася размова з загадчыкам апрацоўчага цэха, быў узняты тэхнічны рэгламент абвалкі мяса. Парушэнні выявіліся менавіта на гэтым этапе, на што і звярнуў увагу прафсаюзны спецыяліст. Заяўніку дадзена зваротная сувязь.

Таксама ў поле зроку прафсаюзаў апынуліся пытанні, звязаныя з асартыментам тавараў у аўталаўках Віцебскай вобласці, адмовай прадпрымальніка ў выдачы касавага чэка на прададзены тавар у Магілёўскай вобласці, неадпаведнасцю цаны на цэнніку і на касе ў сталічным магазіне, з правіламі выдачы кнігі заўваг і прапаноў у Гомелі — у кожным выпадку прафсаюзныя спецыялісты імкнуліся аператыўна разабрацца і даць адказ спажыўцам.

Нагадаем, у грамадскую прыёмную звярнуцца можна асабіста — спецыялісты з 11.30 да 20.30 прымаюць звароты ва ўсіх абласных цэнтрах і Мінску. Падрабязная інфармацыя аб месцы правядзення прыёмаў размешчана на афіцыйным інтэрнет-партале ФПБ.

Алена КРАВЕЦ.