Дзмітрый Крутой падкрэсліў, што Прэзідэнт Беларусі Аляксандр Лукашэнка вызначыў Новасібірскую вобласць адным з ключавых рэгіёнаў Сібірскай федэральнай акругі. Кіраўнік дзяржавы не задаволены існуючымі ўзаемадзеяннем і ўзаемаадносінамі з Сібірру ў цэлым і даручыў узняць іх на больш высокі ўзровень, узмацніць прамысловы блок, у якім крыюцца асноўныя рэзервы. 

«Новасібірск — трэці горад па колькасці ў Расіі. Там вельмі шмат прамысловых вытворчасцей, вельмі моцны навуковы кластар. Тут мы бачым асноўны рэзерв, дзе можам дадаць і дасягнуць ад той мэты, якая пастаўлена кіраўніком нашай краіны, у паўмільярда долараў тавараабароту з Новасібірскай вобласцю», — сказаў кіраўнік Адміністрацыі Прэзідэнта. Да пастаўленай планкі бакі паспяхова рухаюцца.

У прыватнасці, канкрэтныя вынікі бачныя ў сферы станкабудавання. Станкабудаўнічыя заводы «Чырвоны барацьбіт» і «СтанкаГомель» ажыццяўляюць першыя пастаўкі станочнай прадукцыі. Да выставы «ІНАПРАМ», якая пройдзе ў Мінску, плануецца падрыхтаваць вялікую прэзентацыю магчымасцей беларускіх станкабудаўнічых прадпрыемстваў не толькі для Новасібірскай вобласці, але і для ўсіх расійскіх рэгіёнаў. 

«Шчыра з губернатарам пагаварылі па праграме абнаўлення пасажырскага транспарту. У нас ёсць сумеснае прадпрыемства „Белкамунмаш-Сібір“, якое займаецца мадэрнізацыяй трамвайных вагонаў. У 2026 годзе наш МАЗ з газаматорнымі аўтобусамі будзе ўдзельнічаць у конкурсе. У гэтым годзе Новасібірская вобласць не плануе закупляць новую пасажырскую тэхніку, але для падтрымання эканамічнай дзейнасці сумеснага прадпрыемства размешчаны заказ на мадэрнізацыю 10 трамвайных вагонаў», — адзначыў Дзмітрый Крутой.

Ён акцэнтаваў увагу, што мультыбрэндавыя цэнтры — якарныя праекты ў адносінах Беларусі з Новасібірскай вобласцю. «Пляцоўка ў нас існавала — „МТЗ-Сібір“. Наш трактарны завод быў асноўным тут удзельнікам, але з падключэннем астатніх вытворцаў (МАЗ, „Гомсельмаш“, „Лідсельмаш“) і пашырэннем шлейфу прадстаўленасці беларускай тэхнікі гэтай пляцоўкі ўжо мала. Таму губернатар прапанаваў іншыя варыянты, як мы можам пашырэць. Ужо выбрана пляцоўка вытворча-лагістычнага кластара, куды падведзены адпаведныя камунікацыі. На некалькіх га мы такі мультыбрэндавы цэнтр пабудуем», — расказаў кіраўнік Адміністрацыі Прэзідэнта. Ён дадаў, што на Пецярбургскім міжнародным эканамічным форуме БЕЛАЗ падпісаў пагадненне па будаўніцтве на тэрыторыі апераджальнага развіцця ўласнага цэнтра па аказанні сэрвісных паслуг. «Без вось такога ўласнага тэхнічнага цэнтра нашым буйным вытворцам замацавацца на расійскім рынку немагчыма. І БЕЛАЗ, працуючы на апярэджанне, такі цэнтр у Новасібірскай вобласці будзе будаваць», — анансаваў Дзмітрый Крутой. 

У час сустрэчы размова таксама ішла аб сельскай гаспадарцы, пастаўках прадуктаў харчавання, у тым ліку агародніны, садавіны і ягад. У гэтым напрамку лідарам з’яўляецца Брэсцкая вобласць. Напрыклад, Брэсцкі мясакамбінат з расійскімі партнёрамі стварыў сетку магазінаў па продажы ўласнай прадукцыі. «Новасібірскія ўлады прапануюць, акрамя прадуктаў харчавання, яшчэ дадаць у гэтыя крамы і прадукцыю лёгкай прамысловасці. Адпрацоўваецца канцэпцыя з нашым легпрамам. Думаю, што да канца года мы гэты праект ужо запусцім», — выказаў меркаванне кіраўнік Адміністрацыі Прэзідэнта.

Жыхарам Новасібірска ўпадабаўся штогадовы кірмаш беларускіх тавараў. Старшыня Брэсцкага аблвыканкама Пётр Пархомчык на сустрэчы прапанаваў, каб прадпрыемствы Брэстчыны там былі шырока прадстаўлены. Прагучала ідэя арганізаваць Дні Брэсцкай вобласці, якая была падтрымана расійскім бокам.

Фота: БелТА