Для гасцей свята арганізатары падрыхтавалі яркую і насычаную праграму. Асноўнымі тэмамі свята сёлета вызначаны Год беларускай жанчыны, 85-я гадавіна пачатку Вялікай Айчыннай вайны, юбілеі класікаў беларускай літаратуры і пяцігодка якасці. Традыцыйна будзе арганізавана работа фестывалю кнігі і прэсы з прадстаўленнем лепшых узораў сучаснага беларускага кнігавыдання, літаратурнага і культурнага патэнцыялу ўсіх абласцей і Мінска.

Асаблівасцю гэтага года стане павільён рэдкай кнігі, у якім можна будзе ўбачыць унікальныя выданні з усёй краіны — рэдкія старадрукаваныя выданні, факсіміле, мініяцюрныя кнігі, а таксама «кабінет пісьменніка», дзе будуць прадстаўлены рукапісы, асабістыя рэчы, рэдкія фатаграфіі і архіўныя дакументы пісьменнікаў.

Адбудзецца тэматычная інтэрактыўная прэзентацыя Магілёўскай вобласці «Ад берасцянай граматы — да сучасных рэалій», якая прадэманструе асноўныя гістарычныя вехі развіцця кнігадрукавання на Магілёўшчыне.

У першы дзень свята цыкл мерапрыемстваў адкрые святочная служба ў Свята-Крыжаўзвіжанскім храме ў 8:30. У 12:00 усіх запрашаюць на ўрачыстае адкрыццё Дня беларускага пісьменства і ўручэнне Нацыянальнай літаратурнай прэміі, якія пройдуць на галоўнай сцэне. Тут жа ў 16:00 адбудзецца гала-канцэрт рэспубліканскага конкурсу юных чытальнікаў «Жывая класіка». А крыху раней на плошчы насупраць Касцюковіцкага райвыканкама пройдзе ўрачыстае адкрыццё скульптурнай кампазіцыі «Алесь і Алеся», цырымонія спецыяльнага гашэння памятнага канверта і арыгінальнай маркі, прысвечаных Дню беларускага пісьменства.

Яшчэ адной лакацыяй стане Касцюковіцкі краязнаўчы музей, дзе ў 15:00 адбудзецца прэзентацыя экспазіцыі «Фестываль паэзіі і аўтарскай песні «Пісьмянкоў луг».

Вялікі святочны гала-канцэрт стартуе на галоўнай сцэне ў 19:30. Тут жа аб’явяць горад, які прыме Дзень беларускага пісьменства ў наступным годзе. Завершыцца дзень маляўнічым феерверкам.

У нядзелю 6 верасня ў 10:00 пройдзе канцэртная праграма Саюза пісьменнікаў Беларусі на галоўнай сцэне свята. У 12:00 тут жа адбудзецца ўрачыстая цырымонія ўзнагароджвання пераможцаў літаратурных конкурсаў «З табой маё слова, Радзіма», «І кружыцца планета Куляшова». А ў 14:00 можна будзе атрымаць задавальненне ад канцэрта творчых калектываў Магілёўскай вобласці.

У 13:00 у мікрараёне Маладзёжны пройдзе адкрыццё мурала, прысвечанага паэтам і пісьменнікам Касцюковіцкага раёна. У 15:00 на будынку Касцюковіцкай цэнтральнай раённай бібліятэкі ўрачыста адкрыюць памятную дошку І. Г. Чыгрынаву.

На працягу двух дзён на свяце будуць працаваць тэматычныя лакацыі. Сярод іх — творчыя і інтэрактыўныя пляцоўкі грамадскіх аб’яднанняў краіны, спартыўная пляцоўка і дзіцячы гарадок. У горадзе майстроў усе жадаючыя змогуць набыць памятныя сувеніры і вырабы ручной работы і пакаштаваць стравы нацыянальнай беларускай кухні.