У Гомелі супрацоўнікі міліцыі затрымалі групу непаўналетніх ва ўзросце ад 13 да 15 гадоў, якія дзеля лайкаў і новых падпісчыкаў у сацсетках пранікалі на неэксплутаваныя аб’екты прадпрыемстваў і арганізацый, адкуль выкрадалі маёмасць, паведамілі БелТА ва УУС аблвыканкама.
Свае ўчынкі падлеткі здымалі на відэа і дзяліліся імі ў сацыяльных сетках, абмяркоўвалі ў месенджары планы далейшых дзеянняў. «Спалохаўшыся адказнасці, маладыя людзі паспрабавалі выдаліць кантэнт, але ён быў аператыўна адноўлены супрацоўнікамі міліцыі. У тэлефоне аднаго з фігурантаў таксама былі выяўлены матэрыялы экстрэмісцкай накіраванасці», — расказалі ва УУС.
У дачыненні да непаўналетніх і іх бацькоў праводзіцца праверка, па выніках дзеянняў кожнага будзе дадзена прававая ацэнка.
Міліцыя заклікае ўсіх дарослых узмацніць кантроль за тым, як праводзяць час іх дзеці, асабліва на канікулах. «Будзьце пільныя і ўважлівыя да кола зносін дзяцей. Памятайце, што менавіта ад вашага падыходу да выхавання залежыць іх шчаслівае і бяспечнае дзяцінства», — адзначылі ва УУС.
