Аказваецца, псіхічны стан падлетка напрамую ўплывае на тое, як ён выкарыстоўвае і ўспрымае лічбавую прастору, паведамляе smartpress.by.

• Новае даследаванне, праведзенае Кембрыджскім універсітэтам, выявіла значныя адрозненні паміж падлеткамі з дыягнаставанымі псіхічнымі расстройствамі і іх аднагодкамі без такіх дыягназаў. У ім удзельнічалі 3,34 тыс. падлеткаў ва ўзросце ад 11 да 19 гадоў з Вялікабрытаніі.

Вучоныя высветлілі, што падлеткі з любымі псіхічнымі засмучэннямі (трывожнасць, дэпрэсія і засмучэнні харчовых паводзін і іншымі), па іх уласным меркаванні, праводзяць у сацыяльных сетках больш часу (у сярэднім прыкладна на 50 хвілін).

Акрамя таго, яны не проста часцей сядзяць у сацсетках — яны інакш успрымаюць саму сутнасць віртуальных зносін. Напрыклад, такія падлеткі надаюць больш значэння «анлайн-сяброўству», імкнуцца да больш шчыльнага кантакту ў месэнджарах, і могуць мацней перажываць з-за адсутнасці водгуку або «лайкаў».

Акрамя таго, высветлілася, што яны трацяць больш часу на платформы з візуальным кантэнтам (накшталт TikTok), чым на тэкставыя — і гэта можа ўзмацняць эмацыйныя арэлі. Даследнікі падкрэсліваюць, што гэта не значыць, быццам сацсеткі шкодныя самі па сабе, але ўразлівым групам падлеткаў яны могуць несці спецыфічныя рызыкі.

На думку аўтараў, вынікі дапамогуць распрацаваць больш персаналізаваныя рэкамендацыі па выкарыстанні сацыяльных платформ падлеткамі з ментальнымі цяжкасцямі — а магчыма, і адаптаваць інтэрфейсы саміх сэрвісаў для зніжэння эмацыйнага ціску.