Парламенцкая дэлегацыя на чале з намеснікам Старшыні Савета Рэспублікі Ігарам БРЫЛЕВІЧАМ на мінулым тыдні ўзяла ўдзел у Міжнародным форуме ШАС па традыцыйнай медыцыне ў правінцыі Цзянсу Кітайскай Народнай Рэспублікі.
На цырымоніі адкрыцця форуму віцэ-спікер падкрэсліў, што ўзаемадзеянне Мінска і Пекіна ў сферы аховы здароўя выйшла на беспрэцэдэнтна высокі ўзровень:
— У краіне афіцыйна зацверджаны дзве ўрачэбныя спецыяльнасці: «Урач-рэфлексатэрапеўт» і «Урач па традыцыйнай кітайскай медыцыне». Беларускія медыкі праходзяць навучанне і стажыроўкі непасрэдна ў Кітаі, супрацоўнічаючы з буйнымі медыцынскімі ўніверсітэтамі правінцыі Чжэцзян, гарадоў Чанчунь і Цяньцзінь. Спецыялісты Беларусі і Кітая рэгулярна праводзяць сумесныя навукова-практычныя канферэнцыі, абменьваюцца вопытам, што дазваляе дзвюм краінам павышаць даступнасць інавацый і высокатэхналагічнай дапамогі грамадзянам.
Ігар Брылевіч выказаў упэўненасць, што сумесныя ініцыятывы павінны даваць канкрэтныя вынікі, умацоўваць дабрабыт народаў і спрыяць згуртаванню дзяржаў.
На саміце ШАС у Бішкеку Прэзідэнт Беларусі Аляксандр Лукашэнка прадставіў ініцыятыву аб заснаванні Навуковага фонду ШАС, які садзейнічаў бы інтэграцыі патэнцыялаў вучоных.
— З дапамогай гэтага інструмента, як бачыцца, можна будзе падтрымліваць інавацыйныя даследчыя праекты ў самых розных галінах, уключаючы ахову здароўя, фармацэўтыку і біятэхналогіі, — лічыць віцэ-спікер Савета Рэспублікі.
Па яго словах, Беларусь дасягнула значных поспехаў у развіцці інфраструктуры аховы здароўя, транспланталогіі, фармакалогіі і лічбавізацыі медыцынскай сферы:
— Беларускія ўрачы паспяхова праводзяць складаныя аперацыі па перасадцы органаў ва ўсіх абласных цэнтрах, выконваючы каля 500 такіх умяшанняў штогод. Больш за два дзесяцігоддзі ў краіне эфектыўна дзейнічае рознаўзроўневая сістэма абароны здароўя жанчын і дзяцей, дзякуючы чаму ў Беларусі адны з найлепшых у свеце паказчыкаў у плане аховы мацярынства і дзяцінства.
У рамках візіту беларускія парламентарыі вывучылі вопыт работы прадпрыемстваў, якія спецыялізуюцца на даследаваннях, распрацоўках і вытворчасці прэпаратаў на аснове традыцыйнай кітайскай медыцыны. Кітайскія калегі таксама расказалі пра лічбавізацыю вытворчасці і ўкараненне штучнага інтэлекту.
У Цзянсійскім універсітэце традыцыйнай кітайскай медыцыны навучаецца больш за 22 тысячы студэнтаў. Адметная рыса ВНУ — цесная інтэграцыя адукацыі, вытворчасці і навуковых даследаванняў. Універсітэт рыхтуе спецыялістаў высокага ўзроўню, акадэмікаў, майстроў традыцыйнай кітайскай медыцыны.
Беларуская дэлегацыя наведала Хундунскую бальніцу, якая спецыялізуецца на традыцыйных практыках лячэння. Кітайскія спецыялісты дэталёва расказалі пра прафілактыку захворванняў і іх перадавыя спосабы лячэння. Дарэчы, Хундунская бальніца ўжо некалькі гадоў супрацоўнічае з Беларуссю. Стымулам да прафесійнага дыялогу стала падпісанае пагадненне аб пабрацімскіх сувязях паміж Аршанскім раёнам і горадам Наньчанам. Спецыялісты абменьваліся візітамі і дамовіліся працягваць развіццё традыцыйнай кітайскай медыцыны ў Беларусі.
Даслоўна
Удзел беларускіх парламентарыяў у Міжнародным форуме ШАС па традыцыйнай медыцыне быў насычаны практычнай работай. Члены дэлегацыі Савета Рэспублікі наведалі найбуйнейшыя навукова-інавацыйныя прадпрыемствы, медыцынскія ўніверсітэты і спецыялізаваныя клінікі рэгіёна. Дзелячыся ўражаннямі ад маштабу кітайскай медыцынскай інфраструктуры, член Савета Рэспублікі, галоўны ўрач Брэсцкай абласной клінічнай бальніцы Аляксандр КАРПІЦКІ звярнуў увагу на высокі патэнцыял сінергіі дзвюх медыцынскіх школ:
— Уражвае тое, што тут цэлыя інстытуты, універсітэты і бальніцы прысвечаны традыцыйнай кітайскай медыцыне, — адзначыў сенатар. — У нашай краіне элементы гэтай сістэмы ўжо паэтапна ўкараняюцца ў рэгіянальных клініках. Але галоўны вектар і перспектыўны шлях для Беларусі — гэта гарманічная інтэграцыя класічнай заходняй медыцыны, якой мы традыцыйна карыстаемся, і перадавога вопыту традыцыйнай кітайскай медыцыны.
Вывучэнне работы вядучых кітайскіх цэнтраў і вытворчых пляцовак падчас удзелу ў форуме дазволіць беларускаму боку выпрацаваць практычныя механізмы для далейшага ўкаранення інавацыйных методык і фармакалагічных распрацовак Кітайскай Народнай Рэспублікі ў айчынную сістэму аховы здароўя.
