Таўрычаскі палац у Санкт-Пецярбургу гэтымі днямі прымаў вясновую сесію Міжпарламенцкай асамблеі СНД, у ходзе якой адбыўся шэраг важнейшых мерапрыемстваў. Так, першы дзень работы сесіі быў напоўнены двухбаковымі сустрэчамі, работай пастаянных камісій і вылучэннем ініцыятыў. У ліку асноўных тэм — фарміраванне архітэктуры бяспекі на еўразійскім кантыненце, выкарыстанне сістэм штучнага інтэлекту, а таксама маладзёжныя праекты. Ключавой падзеяй другога дня стаў удзел парламенцкай дэлегацыі Беларусі ў 60-м пленарным пасяджэнні Міжпарламенцкай асамблеі дзяржаў — удзельніц Садружнасці Незалежных Дзяржаў.

Міжнародная бяспека і маладзёжная палітыка

У чацвер на палях сесіі прайшлі пасяджэнні пастаянных камісій МПА СНД. На камісіі па палітычных пытаннях і міжнароднай бяспецы старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Алейнік прапанаваў запусціць перагаворны працэс па праекце Еўразійскай Хартыі шматпалярнасці і разнастайнасці ў XXІ стагоддзі.

Адной з важных падзей першага дня стала сустрэча Старшыні Савета Рэспублікі Наталлі Качанавай са Старшынёй Меджліса Туркменістана Дуньягазель Гулманавай. Адкрываючы дыялог, спікер Савета Рэспублікі падкрэсліла, што добрыя адносіны паміж краінамі — гэта, перш за ўсё, заслуга лідараў дзвюх дзяржаў:

— У Беларусі і Туркменістана падобныя погляды на падзеі, якія адбываюцца ў свеце. Мы падтрымліваем адно аднаго на міжнародных пляцоўках, эфектыўна ўзаемадзейнічаем у інтэграцыйных аб’яднаннях. Наталля Качанава заклікала актывізаваць супрацоўніцтва па Міжпарламенцкай лініі і запрасіла калегу з Туркменістана наведаць Беларусь з афіцыйным візітам.

Таксама адбылася сустрэча Старшыні Савета Рэспублікі Наталлі Качанавай са Старшынёй Мілі Меджліса Азербайджанскай Рэспублікі Сахібай Гафаравай, падчас якой бакі абмеркавалі шырокі спектр пытанняў двухбаковага супрацоўніцтва: гандлёва-эканамічнае, гуманітарнае і міжпарламенцкае ўзаемадзеянне.

Здароўе нацыі — падмурак устойлівага развіцця любой дзяржавы

Ключавым мерапрыемствам другога дня стаў удзел парламенцкай дэлегацыі Беларусі ў 60-м пленарным пасяджэнні Міжпарламенцкай асамблеі дзяржаў — удзельніц СНД, дзе Наталля Качанава прадставіла дасягненні беларускай аховы здароўя і прапанавала правесці на пляцоўцы Асамблеі мерапрыемства па тэме традыцыйных сямейных каштоўнасцяў.

— Наша арганізацыя без перабольшання стала самай аўтарытэтнай міжнароднай парламенцкай пляцоўкай на прасторы Садружнасці. Тут, за круглым сталом, на прынцыпах узаемнай павагі, уліку нацыянальных інтарэсаў і раўнапраўя, мы выпрацоўваем не проста ўзгодненыя падыходы да гарманізацыі заканадаўстваў, але і канкрэтныя сумесныя ініцыятывы ў эканоміцы, сацыяльнай палітыцы, бяспецы і гуманітарным развіцці, — адзначыла Наталля Качанава.

Паводле слоў спікера, менавіта ў Асамблеі ствараецца тая самая мадэльная база, якая ляжыць у аснове многіх нацыянальных законаў і перадавых рашэнняў. І сёння, калі спробы ўмяшання ва ўнутраныя справы звонку не спыняюцца, Міжпарламенцкая асамблея застаецца надзейнай апорай у абароне дзяржаўнага суверэнітэту кожнай з краін СНД.

Спікер Савета Рэспублікі звярнула ўвагу, што 2026-ы аб’яўлены Годам аховы здароўя ў СНД. Паводле яе слоў, гэта рашэнне своечасовае. Здароўе нацыі — падмурак дэмаграфічнай бяспекі, эканамічнай стабільнасці і ўстойлівага развіцця любой дзяржавы.

— Беларусь паслядоўна выбудоўвае высокатэхналагічную, арыентаваную на чалавека сістэму аховы здароўя. Як падкрэсліў наш Прэзідэнт, у беларускай медыцыне ёсць падставы для гонару. Мы захавалі ўсё найлепшае, што было ў савецкай медыцыне, і прымножылі папярэднія дасягненні. Гэты стратэгічны курс сёння прыносіць рэальныя вынікі, — звярнула ўвагу Наталля Качанава.

Яна адзначыла, што дзякуючы створанай шматузроўневай сістэме ранняга ўмяшання і высокатэхналагічнай дапамогі Беларусь мае высокія міжнародныя рэйтынгі па паказчыку нізкай дзіцячай смяротнасці і ўмовах для нараджэння дзяцей. За гэтымі дасягненнямі — выратаваныя жыцці, здароўе будучай нацыі і вялізная праца беларускіх урачоў. Асаблівым гонарам, паводле слоў спікера, з’яўляецца дзейнасць навукова-практычных цэнтраў. Беларускія хірургі выконваюць высокатэхналагічныя аперацыі ў кардыялогіі, нейрахірургіі, траўматалогіі і транспланталогіі. Шэраг вядучых медыцынскіх устаноў Беларусі ўзначальваюць члены Савета Рэспублікі.

У Праграме сацыяльна-эканамічнага развіцця Рэспублікі Беларусь на 2026–2030 гады ўмацаванне здароўя нацыі вызначана адным з ключавых прыярытэтаў нацыянальна-дэмаграфічнай бяспекі, звярнула ўвагу Старшыня Савета Рэспублікі:

— Мы ставім перад сабой канкрэтныя мэты: павелічэнне чаканай працягласці жыцця насельніцтва, зніжэнне агульнага ўзроўню смяротнасці, асаблівую ўвагу ўдзяляем развіццю прафілактычнай медыцыны.

Наталля Качанава адзначыла, што сёлета ўспамінаецца сумная дата — 40-годдзе аварыі на Чарнобыльскай АЭС. Для многіх краін, асабліва для Беларусі, яна стала сур’ёзным выпрабаваннем.

— Наша краіна набыла велізарны вопыт у ліквідацыі наступстваў аварыі, у тым ліку ў радыяцыйнай медыцыне, у доўгатэрміновым маніторынгу здароўя насельніцтва і яго сацыяльнай абароне. Часткова гэты вопыт увайшоў у мадэльнае заканадаўства Асамблеі. Прыйшоў час яго актуалізаваць. І планы па распрацоўцы мадэльнага закона аб радыяцыйнай бяспецы ў медыцыне вельмі своечасовыя, — дадала яна.

Спікер лічыць сімвалічным, што 60-е пленарнае пасяджэнне Асамблеі праходзіць літаральна праз тыдзень пасля Міжнароднага дня сям’і, які адзначаецца 15 мая. Паводле яе слоў, абарона традыцыйных сямейных каштоўнасцяў, умацаванне інстытута сям’і, дэмаграфічная бяспека для ўсіх краін Садружнасці ўваходзяць у лік прыярытэтных задач.

Улічваючы высокую значнасць гэтай тэмы, спікер Савета Рэспублікі прапанавала разгледзець магчымасць правядзення на пляцоўцы Асамблеі мерапрыемства на тэму традыцыйных сямейных каштоўнасцяў. Гэта надасць дыялогу аб сям’і міжпарламенцкі ўзровень, дазволіць абмяняцца найлепшымі практыкамі, падкрэсліла Наталля Качанава.

Старшыня Савета Рэспублікі дадала, што сумесная работа ў рамках Асамблеі, назапашаны вопыт і, галоўнае, імкненне адстойваць суверэнныя інтарэсы сваіх дзяржаў дазваляюць упэўнена рухацца наперад.

***

У другі дзень таксама адбыўся шэраг двухбаковых сустрэч са спікерамі парламентаў з краін СНД. У рамках вясновай сесіі МПА СНД Старшыня Савета Рэспублікі Наталля Качанава правяла двухбаковую сустрэчу са Старшынёй Сената Олій Мажліса Рэспублікі Узбекістан Танзілай Нарбаевай, са Старшынёй Жагорку Кенеша Кыргызстана Марленам Маматаліевым, Старшынёй Савета Федэрацыі Валянцінай Матвіенка. Падчас сустрэчы бакі абмяркоўвалі актуальныя пытанні супрацоўніцтва, а таксама рэалізацыю сумесных міжпарламенцкіх праектаў.

Падрыхтаваў Данііл ХМЯЛЬНІЦКІ

Фота прадастаўлена Выдавецкім домам «Беларусь сегодня»