Прэзідэнт прызначыў кіраўнікоў мясцовых выканаўчых і распарадчых органаў, а таксама аднаго з самых важных дзяржаўных прадпрыемстваў краіны. Руслан Пархамовіч узначаліў Гомельскі гарвыканкам, Аляксандр Верамееў — Мазырскі райвыканкам. Генеральным дырэктарам ААТ «Беларускі металургічны завод — кіруючая кампанія холдынга «Беларуская металургічная кампанія» прызначаны Аляксандр Саковіч. 

«Трэба вырабляць і прадаваць»

У новага кіраўніка аднаго з вядучых прамысловых прадпрыемстваў краіны Прэзідэнт удакладніў, што ўваходзіць у Беларускую металургічную кампанію.

Аляксандр Саковіч праінфармаваў, што гэта пяць прадпрыемстваў і філіял. «У склад холдынга «Беларуская металургічная кампанія» ўваходзіць кіруючая кампанія холдынга «Беларускі металургічны завод», ААТ «Мінскі падшыпнікавы завод», ААТ «Палессеэлектрамаш», ААТ «Магілёўскі металургічны завод» і ААТ «Кобрынскі інструментальны завод «СІТОМА», яшчэ агракамбінат «Папаратнае-Агра», — канкрэтызаваў ён.

Кіраўнік дзяржавы пацікавіўся сітуацыяй у сельскагаспадарчым прадпрыемстве. «Пабудавана новая малочнатаварная ферма, — адзначыў Аляксандр Саковіч. — У фінансаванні будаўніцтва ўдзельнічаў і «Беларускі металургічны завод».

Аляксандр Лукашэнка ўдакладніў, у якім становішчы знаходзяцца ўсе прадпрыемствы холдынга. «Яны ўсе „дыхаюць“ нармальна, яны ў рабочым стане? — канкрэтызаваў беларускі лідар. — Або там праблемы?»

Па словах генеральнага дырэктара ААТ «Беларускі металургічны завод — кіруючая кампанія холдынга «Беларуская металургічная кампанія», усе прадпрыемствы працуюць, але праблем хапае на кожным з іх. «Пачынаючы ад Мінскага падшыпнікавага завода, які ў цяперашні час рэалізуе інвестыцыйныя праекты, — заўважыў ён. — Ёсць шэраг праблем, якія неабходна будзе вырашаць». 

Кіраўнік дзяржавы ўдакладніў, як працуе ААТ «Магілёўскі металургічны завод».

«Слаба, таварыш Прэзідэнт, — заўважыў кіраўнік Адміністрацыі Прэзідэнта Дзмітрый Крутой. — На апошнім пасяджэнні выканкама разбіралі там сітуацыю. На жаль, сітуацыя складаная: зніжэнне аб’ёмаў вытворчасці, удзел у гэтым холдынгу не вельмі прадметны».

«Ты ж разумееш, скідкі тут ніякай не будзе, — звярнуўся Аляксандр Лукашэнка да новага кіраўніка холдынга. — Тым больш, начальнік упраўлення ўрада (да прызначэння Аляксандр Саковіч з’яўляўся начальнікам упраўлення прамысловай палітыкі Апарату Савета Міністраў. — „Зв.“). Гэта значыць, адказваеш у тым ліку і за гэты кірунак. І металургічны завод, наш БМЗ, — гэта вельмі сур’ёзнае прадпрыемства. І дарэчы, не самае горшае было. Таму трэба вырабляць і прадаваць». 

«Дзяржпадтрымка аказана сур’ёзная, якую трэба вяртаць», — адзначыў Дзмітрый Крутой.

«Таму спасылак не павінна быць ніякіх, — паставіў задачу Прэзідэнт новаму гендырэктару прадпрыемства. — Па-мужчынску прыйшоў і пачаў працаваць. Глядзі, з кім працаваць, як працаваць — гэта ўжо твая справа».

«Намеснікам там быў, таму спецыфіку ўсю ведае», — заўважыў кіраўнік Адміністрацыі Прэзідэнта.

«Вельмі спадзяюся, што з прыходам новага мэра Гомеля ўсё пойдзе ў лепшы бок»

Звяртаючыся да новага старшыні Гомельскага гарадскога выканаўчага камітэта Руслана Пархамовіча, які дагэтуль з’яўляўся памочнікам Прэзідэнта — інспектарам па Гомельскай вобласці, Аляксандр Лукашэнка пацікавіўся, з якімі думкамі ён пагаджаўся на новую пасаду.

Па словах Руслана Пархамовіча, прапаноўваючы яго кандыдатуру на гэту пасаду, напэўна, улічвалі тое, што ён найбольш схільны да практычнай дзейнасці. «Паспрабаваў сябе ў розных іпастасях, але работа „ў полі“ для мяне, напэўна, больш зручная, — сказаў мэр Гомеля. — Я дастаткова паглыблены ў сітуацыю ў другім па велічыні горадзе нашай краіны. Бачу, што ёсць перспектывы для горада. Патрэбна пазаймацца камуналкай, будаўніцтвам, аховай здароўя і адукацыяй. Таму ёсць апорныя кропкі, але рэзерваў у горада дастаткова». 

«Я так зразумеў, што і сам ты не супраць „у полі“ папрацаваць?» — удакладніў беларускі лідар у новага мэра, атрымаўшы станоўчы адказ. 

З гэтага меркавання, па словах кіраўніка дзяржавы, ён і зыходзіў, прымаючы кадравае рашэнне ў дачыненні да Руслана Пархамовіча. «Але хачу, Руслан, каб ты разумеў, што гэта сапраўды найбуйнейшы горад нашай краіны, — падкрэсліў Аляксандр Лукашэнка. — Як ты сказаў, другі па велічыні».

«Прыгожы горад. Нямала там зрабілі ў апошні час для таго, каб ён глядзеўся», — звярнуў увагу Прэзідэнт. «У Гомелі і на Гомельшчыне людзі вельмі добрыя, — дадаў беларускі лідар. — Таму працаваць там можна. Я вельмі спадзяюся, што з прыходам новага мэра Гомеля ўсё пойдзе ў лепшы бок. Тым больш, вопыт у цябе ўжо прыстойны. Таму вельмі хачу, каб атрымалася. Таму толькі наперад!»

«Давядзецца бачыць і прамысловыя прадпрыемствы»

У новага старшыні Мазырскага раённага выканаўчага камітэта Аляксандра Верамеева, які дагэтуль узначальваў Петрыкаўскі райвыканкам, кіраўнік дзяржавы ўдакладніў, ці не закружыцца ў яго ад такіх узлётаў галава.

«Ты хутка неяк у апошні час па гэтай кар’ернай лесвіцы падымаўся, — звяртаючыся да кіраўніка раёна, заўважыў Аляксандр Лукашэнка. — Але заслужана». 

Па словах Прэзідэнта, нягледзячы на кароткія прамежкі (два-тры гады) работы на пэўнай пасадзе, Аляксандр Верамееў вельмі паглыбляўся і ўнікаў у даручаныя яму справы. «І самае галоўнае, у цябе за плячыма — вопыт работы добрых прадпрыемстваў, — падкрэсліў беларускі лідар. — І ў сельскай гаспадарцы. Гэта „Палессе-Агра“. Нядрэннае прадпрыемства было. І нават будучы нядрэнным прадпрыемствам, яно пры табе там дадавала, калі ты быў там кіраўніком. Мяне падкупляе тое, што ты ўнікаў у вытворчасць. Ты сістэмны чалавек. Па меншай меры, у Петрыкаўскім раёне я бачыў гэта, адчуваў».

Пры гэтым Аляксандр Лукашэнка звярнуў увагу на тое, што Мазырскі раён, які ўзначаліць Аляксандр Верамееў, — гэта гіганцкі раён, у якім сканцэнтраваны буйныя прамысловыя прадпрыемствы. «Як і Руслану (Пархамовічу. — „Зв.“), так і табе давядзецца бачыць і прамысловыя прадпрыемствы, — паставіў задачу кіраўнік дзяржавы. — Нягледзячы на тое, што яны, можа быць, рэспубліканскага падпарадкавання. Там чужых няма прадпрыемстваў. Там усе твае будуць. Таму я вельмі спадзяюся, што твой характар (такая палеская ўпартасць сапраўдная) дазволіць нам і на рэспубліканскім узроўні спрацаваць так, як належыць».

«Гатовы працаваць, утрымаць тыя пазіцыі, якія былі напрацаваны, і далей развівацца», — адзначыў старшыня Мазырскага райвыканкама.

Звяртаючыся да ўсіх зноў прызначаных, Прэзідэнт адзначыў, што яны — людзі вядомыя. «Людзі з вопытам пэўным, — дадаў ён. — І чалавек, папрацаваўшы ва ўрадзе фактычна, адказваў за гэты ўчастак. Не гаворачы ўжо аб міністры — гэта вялікі вопыт, вельмі вялікі, член урада (пэўны час Руслан Пархамовіч займаў пасаду міністра архітэктуры і будаўніцтва. — «Зв.»). І памочнікам Прэзідэнта з кадрамі давялося працаваць. Я думаю, Івану Іванавічу (Івану Крупко, старшыні Гомельскага аблвыканкама. — „Зв“.) будзе добрая падмога. Удваіх вы зможаце працаваць». 

У рабочым парадку ўзгоднены прызначэнні Юрыя Аляксея членам Гродзенскага аблвыканкама і Уладзіміра Матусевіча намеснікам начальніка Галоўнага ўпраўлення па забеспячэнні дзейнасці камісій Парламенцкага Сходу Саюза Беларусі і Расіі. 

Прэзідэнт узгадніў прызначэнне на пасаду начальніка галоўнага ўпраўлення кадравай палітыкі Адміністрацыі Прэзідэнта Аляксандра Шундрыка.

Даслоўна

«Ключавы момант — максімальнае задзейнічанне ўнутраных рэзерваў прадпрыемства»

Як адзначыў у размове з журналістамі генеральны дырэктар ААТ «Беларускі металургічны завод — кіруючая кампанія холдынга «Беларуская металургічная кампанія» Аляксандр САКОВІЧ, кіраўнік дзяржавы паставіў дакладныя, канкрэтныя задачы ў частцы росту экспарту, павышэння эфектыўнасці кіравання прадпрыемствамі, якія ўваходзяць у холдынг, пошуку ўнутраных рэзерваў. 

Па словах гендырэктара, Прэзідэнтам пастаўлена задача і па вяртанні аказанай раней дзяржаўнай падтрымкі, прыняцці неабходных рашэнняў у гэтым пытанні. «Прадпрыемству была аказана сур’ёзная фінансавая падтрымка: у 2021 годзе была праведзена рэструктурызацыя даўгавых абавязацельстваў, — канкрэтызаваў ён. — Акрамя гэтага, на ўзроўні кіраўніка дзяржавы і ўрада прыняты шэраг іншых мер па падтрымцы гэтага прадпрыемства. Таму ў цяперашні час ключавым момантам з’яўляецца максімальнае задзейнічанне ўнутраных рэзерваў прадпрыемства». 

Аляксандр Саковіч звярнуў увагу на тое, што Беларускі металургічны завод з’яўляецца экспартна арыентаваным прадпрыемствам. «З улікам санкцый, якія былі ўведзены ў 2022 годзе, еўрапейскія рынкі сталі недаступныя для прадпрыемства, — удакладніў ён. — Таму ў цяперашні час экспартныя адгрузкі сканцэнтраваны на рынак Расійскай Федэрацыі (гэта каля 80 % у структуры продажаў прадпрыемства). Больш за тое, дадатковыя, альтэрнатыўныя рынкі патрабуюць прапрацоўкі і дыверсіфікацыі. Гэта выхад на рынак СНД і іншых рэгіёнаў». 

«Важна не зламаць тое, што добра працуе, і рухацца эвалюцыйна»

Старшыня Гомельскага гарадскога выканаўчага камітэта Руслан ПАРХАМОВІЧ расказаў аб планах па развіцці Гомеля. «Горад — самы буйны ў краіне, не лічачы сталіцы, — адзначыў мэр абласнога цэнтра. — Ён дынамічна развіваецца, валодае цудоўным турыстычным патэнцыялам. Думаю, паляпшэнню няма мяжы. Мы паспрабуем зрабіць яго яшчэ больш прыгожым, стабільным з эканамічнага пункту гледжання і камфортным для пражывання грамадзян». 

Расказаў старшыня Гомельскага гарвыканкама і аб планах па развіцці гарадоў-спадарожнікаў абласнога цэнтра. «Кіраўнік дзяржавы неаднаразова ставіў задачу па дэурбанізацыі, — канстатаваў ён. — На мой погляд, Гомель таксама, як і Мінск, павінен мець гарады-спадарожнікі. Каля Гомеля — Ветка на адлегласці 20 кіламетраў і Добруш на адлегласці 30 кіламетраў. Гэта фактычна гарады-спадарожнікі, якія павінны развівацца».

Яшчэ будучы на папярэдняй пасадзе, Руслан Пархамовіч даведаўся, што хвалюе жыхароў абласнога цэнтра. «Гэта сфера камунальнай гаспадаркі, — канкрэтызаваў ён. — Практычна 70 % усіх зваротаў — гэта звароты, якія адносяцца да праезнай часткі вуліц. Дзесьці ёсць і крытычная ямачнасць, дзесьці не зусім зручныя пешаходныя дарожкі».

Актуальнай тэмай, якая таксама хвалюе гамяльчан, мэр назваў водазабеспячэнне. «Ёсць звароты і даволі канструктыўныя прапановы і па іншых сферах: будаўніцтва, адукацыя, ахова здароўя, — дадаў ён. — Але ўсё ж такі камуналка — гэта база». 

Па словах старшыні Гомельскага гарвыканкама, важна не зламаць тое, што добра працуе, і рухацца эвалюцыйна. «База добрая, — адзначыў Руслан Пархамовіч. — Мы перагледзім тое, што мае дачыненне ў першую чаргу да камфортнасці пражывання насельніцтва: транспарт, дарогі, прыборка вуліц і пад’ездаў».

«Падтрымліваць, кантраляваць і настройваць работу»

Як звярнуў увагу старшыня Мазырскага раённага выканаўчага камітэта Аляксандр ВЕРАМЕЕЎ, адна з асноўных задач, пастаўленая Прэзідэнтам, датычыцца паляпшэння якасці пражывання грамадзян на даверанай яму тэрыторыі. «Найперш гэта работа ў сферы жыллёва-камунальнай гаспадаркі, — канкрэтызаваў ён. — Мазыр размешчаны на гарыстай мясцовасці, і ёсць пэўныя цяжкасці ў планавай рабоце аддзела ЖКГ. На гэта на першым этапе і будзе накіравана асноўная ўвага і планавая работа».

Не застанецца па-за ўвагай новага кіраўніка раёна і сельская гаспадарка. «Сельскагаспадарчыя работы — цяпер у самам разгары, — канстатаваў Аляксандр Верамееў. — Ідзе пасяўная кукурузы, ажыццяўляецца нарыхтоўка кармоў. Сістэма ўся адпрацавана. Застаецца толькі падтрымліваць, кантраляваць і настройваць работу».

Па словах кіраўніка раёна, Мазыр — статысячны горад, які развіты па ўсіх кірунках. «Раён нескладаны, мы гатовы абмяркоўваць праблемы і вырашаць іх, — удакладніў ён. — Сям’я і каманда падтрымліваюць, заўсёды гатовы ісці са мной, быць побач». 

Аляксандр Верамееў адзначыў, што раён укамплектаваны кадрамі. «Сістэма патрабуе працаваць з кадрамі штогод, штодзённа і на пастаяннай аснове», — канстатаваў ён.

Вераніка КАНЮТА
Фота БелТА