XІІІ Форум рэгіёнаў Беларусі і Расіі афіцыйна стартаваў і гэтымі днямі праходзіць у Мінску і Мінскай вобласці. За гады правядзення гэта маштабнае саюзнае мерапрыемства набыло статус традыцыйнай дыялогавай пляцоўкі для прадстаўнікоў органаў улады і бізнес-супольнасцяў Расіі і Беларусі. Форум рэгіёнаў па традыцыі праходзіць пад эгідай Савета Рэспублікі і Савета Федэрацыі, а таму і нядзіўна, што ў кіраўнікоў гэтых заканадаўчых органаў у гэтыя дні надзвычай насычаная праграма.

У першы дзень работы форуму адбылося пасяджэнне 10 тэматычных секцый, якія закранулі ўсе актуальныя пытанні саюзнага парадку дня. Акрамя таго, 25 чэрвеня прайшла экспертная сесія і сумесны Камітэт па стандартызацыі і якасці. Эксперты, сенатары і бізнес-колы дзвюх краін абмяркоўвалі пытанні тэхналагічнага суверэнітэту, харчовай бяспекі, рэгіянальнай палітыкі, аховы здароўя, культуры і маладзёжнага супрацоўніцтва.

Па асобнай праграме 25 чэрвеня працавалі спікеры верхніх палат парламента. Першым і самым важным пунктам на маршруце Старшыні Савета Рэспублікі Наталлі Качанавай і Старшыні Савета Федэрацыі Валянціны Матвіенка стаў Палац Незалежнасці. Там адбылася сустрэча спікераў з Прэзідэнтам Беларусі Аляксандрам Лукашэнкам.

Пасля прыёму ў кіраўніка дзяржавы спікеры ўсклалі вянкі да манумента на плошчы Перамогі. Пасля цырымоніі ўскладання Наталля Качанава і Валянціна Матвіенка далі старт аўтапрабегу праекта «Гарады-героі — гарады Герояў». Гэты маштабны патрыятычны аўтапрабег, які прымеркаваны да 85-годдзя пачатку Вялікай Айчыннай вайны і стварэння народнага апалчэння, праходзіць з 22 чэрвеня да 3 ліпеня. У яго праграме — больш за 100 мерапрыемстваў. Дарэчы, маштабны аўтапрабег закране ўсе рэгіёны Беларусі, а завершыцца вяртаннем экіпажаў у Маскву з правядзеннем урачыстай акцыі 3 ліпеня каля помніка 21-й дывізіі народнага апалчэння на Кутузаўскім праспекце.

Звяртаючыся да экіпажаў, спікеры верхніх палат парламентаў Беларусі і Расіі выказалі цёплыя словы пажаданняў. «Несумненна, нас звязваюць дзве краіны, у нас агульная слаўная гісторыя і Перамога ў Вялікай Айчыннай вайне, — адзначыла Старшыня Савета Рэспублікі Наталля Качанава. — Зусім нядаўна мы адзначалі журботную дату — 85 гадоў з пачатку Вялікай Айчыннай вайны, якая прыйшла на нашу зямлю. 

Беларусь першая прыняла гэты ўдар на сябе. Мы, вядома ж, упэўненыя ў тым, што і вы, маладое пакаленне, будзеце з гонарам і годнасцю працягваць гэту вялікую місію — несці мір і тую праўду аб нашай Вялікай Айчыннай вайне, аб нашым грамадстве».

Старшыня Савета Федэрацыі Валянціна Матвіенка ў сваю чаргу заявіла, што ёй вельмі падабаюцца словы Прэзідэнта Рэспублікі Беларусь Аляксандра Рыгоравіча Лукашэнкі.«У нас дзве дзяржавы, але агульная Айчына», — прывяла словы беларускага лідара Валянціна Матвіенка. — І вельмі важна, каб моладзь ведала пра гэта, каб працягвала тыя слаўныя традыцыі ў памяць нашых герояў — пакалення пераможцаў».

Затым спікеры ўзялі ўдзел ва ўрачыстай цырымоніі адкрыцця помніка лётчыку гвардыі лейтэнанту Аляксандру Мамкіну, які ў вайну пераправіў у тыл каля 200 беларускіх сірот-выхаванцаў Полацкага дзіцячага дома. Помнік устаноўлены ў мікрараёне Зялёны Луг.

Фінальным пунктам на маршруце парламентарыяў стала наведванне Спецыялізаванага ліцэя МУС. Наталля Качанава і Валянціна Матвіенка азнаёміліся з работай навучальнай установы.

Ужо заўтра на базе Мінскага міжнароднага выставачнага цэнтра BELEXPO адбудзецца сустрэча Старшыні Савета Рэспублікі і Старшыні Савета Федэрацыі з кіраўнікамі мясцовых органаў улады Беларусі і органаў дзяржаўнай улады суб’ектаў Расійскай Федэрацыі, а таксама пленарнае пасяджэнне ХІІІ Форуму рэгіёнаў Беларусі і Расіі. 

Падрыхтаваў Данііл ХМЯЛЬНІЦКІ

Фота ТГ-канала Савета Рэспублікі