Як звярнуў увагу старшыня Беларускай федэрацыі дзюдо Аляксандр СЦЯШЭНКА, першынство Беларусі да 23 гадоў праводзіцца ў памяць аб заслужаным трэнэры Вячаславе Мікалаевічы Сянкевічы. «Ён быў вядомым спецыялістам, пад кіраўніцтвам якога трэніравалася нацыянальная зборная, і яго вучні дасягалі высокіх вынікаў на чэмпіянатах Еўропы і свету, — распавёў Аляксандр Сцяшэнка. — Турнір арганізаваны ў гонар яго ўкладу ў развіццё ў краіне дзюдо».

Кажучы аб падрыхтоўцы спартсменаў, старшыня Беларускай федэрацыі дзюдо адзначыў, што яна заўсёды знаходзіцца на высокім узроўні. «Гэты старт з’яўляецца важным этапам адбору на чэмпіянат Еўропы, які пройдзе ў пачатку лістапада ў Рэспубліцы Молдова, — удакладніў ён. — Упэўнены, што хлопцы і дзяўчаты пакажуць усё, чаму навучыліся, і будуць змагацца за месца ў камандзе».

Па словах Аляксандра Сцяшэнкі, спаборніцтвы маюць значэнне не толькі для адбору ў нацыянальную каманду, але і для падрыхтоўкі да міжнародных стартаў. «У гэтым узросце спартсмены ўжо практычна дарослыя, і тыя, хто праявіць сябе, могуць стаць кандыдатамі ў нацыянальную зборную Рэспублікі Беларусь для ўдзелу ў турнірах міжнароднага ўзроўню», — заўважыў ён.

У кожнай вазе ёсць свае лідары. «У лёгкіх вагах вылучаюцца Рыгор Зурначян і Канстанцін Гуркаеў, — канкрэтызаваў старшыня федэрацыі. — Незапланаваным вынікам стала тое, што Даніла Новікаў з Мінска перамог чэмпіёна рэспублікі Мацвея Валасевіча. У 81 кг сваёй упэўненай барацьбой вылучаецца Глеб Хаткоўскі, які ўжо з’яўляецца адным з лідараў дарослай каманды. У 100 кг, у адсутнасці лідара Яўгена Морава, які зараз на чэмпіянаце свету, з’явілася магчымасць праявіць сябе для гродзенскага спартсмена Панкрата Сурбы. У цяжкай вазе (плюс 100 кг) Мікіта Маскоў і Сяргей Якубенка выйшлі ў фінал, будзе цікава ўбачыць, хто з іх стане лідарам у гэтай катэгорыі». 

Яшчэ на этапе падрыхтоўкі да спаборніцтваў пагутарылі са спартсменамі. Дзюдаісты адзначылі важнасць такіх турніраў для свайго развіцця, а некаторыя падзяліліся сакрэтам дасягнення пастаўленых мэт.

Як падзяліўся Дзмітрый Штык, бронзавы прызёр у вагавай катэгорыі 66 кг, спаборніцтвы не зусім апраўдалі яго чаканні. «Пачаў з перамогі ў першай сустрэчы, але потым саступіў Льву Саманкову, — сказаў спартсмен. — У трэцім паядынку мне ўдалося ўпэўнена абыграць Міхаіла Караткевіча. Далей была напружаная сустрэча з Уладзіславам Куляшом, дзе я сабраўся і адолеў суперніка. У паядынку за „бронзу“ змагаўся з Іванам Мацянка. Нягледзячы на стомленасць, выкарыстаў свой каронны кідок і заняў трэцяе месца на турніры».

Па словах Анастасіі Карпенкі, пераможцы ў вагавай катэгорыі да 52 кг, спаборніцтвы запомняцца ёй надоўга. «Я ўпершыню за доўгі час не прапусціла першую сустрэчу, — удакладніла спартсменка. — У ёй было цяжка, не змагла сабрацца з думкамі, але ў рэшце рэшт адолела суперніка».

Спартсмены і трэнеры, якія ўдзельнічалі ў першынстве Беларусі па дзюдо да 23 гадоў у праграме «Кубак В. М. Сенкевіча», не толькі ўшанавалі памяць выдатнага трэнера, але і заклалі аснову для росту і развіцця будучых зорак дзюдо ў нашай краіне.

Эліна ГРАМЫКА, вучаніца 11 «Д» класа Рэспубліканскага дзяржаўнага вучылішча алімпійскага рэзерву.

Фота Вольгі САРОКІ