Намеснік міністра зрабіў асаблівы акцэнт на праведзенай рабоце па пераадоленні выклікаў дэмаграфічнай бяспекі, з якімі ў той ці іншай ступені сутыкаюцца развітыя краіны свету. Вырашэнне праблемы ў бягучай пяцігодцы забяспечваецца праз выкананне трох задач: павялічыць колькасць народжаных, павысіць працягласць жыцця, знізіць смяротнасць.

«Працягваем падтрымліваць шматдзетныя сем’і: у 2026-м памер сямейнага капіталу вырас да 35,5 тыс. рублёў, адкрыта 5,9 тыс. новых рахункаў. Павялічваюцца і штомесячныя дапамогі па доглядзе за дзецьмі. У поўным аб’ёме захоўваюцца падатковыя, працоўныя, жыллёвыя і іншыя меры падтрымкі. Дзяржава зрабіла крок насустрач і тым, у каго самастойна не атрымліваецца спазнаць радасць бацькоўства і мацярынства: пашыраны магчымасці выкарыстання ЭКА, дзякуючы чаму на свет ужо з’явіліся 604 маленькія беларусы. Для павышэння прэстыжу інстытуту шлюбу не менш важная матывацыя прыкладам. У бягучым годзе ва ўсіх рэгіёнах краіны прайшлі конкурсы, фестывалі і форумы, закліканыя папулярызаваць гісторыі бацькоў, якія паспяхова сумяшчаюць працу і выхаванне дзяцей. І гэтая піяр-кампанія таксама дае вынікі. Па апытаннях НАН за год значнасць сям’і ў іерархіі каштоўнасцяў вырасла», — адзначыў Аляксей Зубовіч.

Ключавыя складнікі актыўнага даўгалецця — даступная медыцынская дапамога і здаровы лад жыцця. Дзяржава рэагуе на гэтыя патрэбы, інвестуючы значныя сродкі ў развіццё інфраструктуры на месцах. У рэгіёнах адкрываюцца новыя паліклінікі і бальніцы, папаўняецца сетка спартыўных устаноў. «Гэта азначае, што ў нашых людзей з’явілася больш магчымасцяў падтрымліваць добрую фізічную форму і пры неабходнасці атрымліваць хуткае і бяспечнае лячэнне», — падсумаваў намеснік міністра.