На мітынг сабраліся прадстаўнікі Магілёўскага аблвыканкама і гарвыканкама, грамадскіх аб’яднанняў і палітычных партый, дэпутаты, працоўныя калектывы, ветэраны і моладзь.

Удзельнікі акцыі падкрэслілі гістарычнае значэнне падзей 1917 года для фарміравання дзяржаўнасці і сацыяльнай справядлівасці. Намеснік старшыні Магілёўскага абласнога Савета дэпутатаў Міхаіл Жудро адзначыў, што Вялікая Кастрычніцкая сацыялістычная рэвалюцыя стала народнай рэвалюцыяй, якая адкрыла перспектыву сацыялізму. «Гэтая падзея змяніла ход гісторыі і стала імпульсам для развіцця новай мадэлі дзяржаўнасці. Гэта быў, ёсць і будзе ўнікальны вопыт у гісторыі ўсяго чалавецтва», — сказаў Міхаіл Жудро. 

Ён дадаў, што людзі атрымалі права на працу, адукацыю і адпачынак, а ўсведамленне датычнасці да лёсу дзяржавы выклікала нябачаны энтузіязм. Сёння, паводле яго слоў, важна пераасэнсоўваць аспекты гэтага перыяду як знакавага для гістарычнай памяці.

Дэпутат Палаты прадстаўнікоў Нацыянальнага сходу Наталля Тарасенка акцэнтавала ўвагу на захаванні гістарычнай памяці, якая замацавана ў абноўленай Канстытуцыі Беларусі. Яна звярнула ўвагу прысутных на тое, што гісторыя жыве ў назвах раёнаў, плошчаў і вуліц горада, а таксама ў мемарыяльных комплексах. «Гэтую сувязь пакаленняў перапыніць нельга, таму што калі мы не будзем гэта шанаваць, не будзем ставіць у аснову самыя галоўныя чалавечыя каштоўнасці, такія як мір, стварэнне, павага і сяброўства народаў, мы страцім тое, дзеля чаго некалі, 100 гадоў таму, людзі аддавалі свае жыцці», — адзначыла Наталля Тарасенка.

Прарэктар па выхаваўчай рабоце Магілёўскага дзяржаўнага ўніверсітэта імя А.А. Куляшова Уладзімір Ясеў падкрэсліў, што ў Беларусі захоўваецца традыцыя да дзяржаўных свят адкрываць новыя аб’екты — усё для людзей. «У нашай дзяржаве традыцыя да любога свята нешта рабіць новае, рабіць канкрэтныя рэчы, канкрэтныя справы для людзей: укараняць праекты, будаваць будынкі, дарогі, адкрываць прадпрыемствы. Гэта адна з добрых традыцый, якая накіравана на сацыяльны дабрабыт людзей», — дадаў ён.