Максім Рыжанкоў сустрэўся з Наследным прынцам, Намеснікам Прэм’ер-міністра па эканамічных пытаннях Султаната Аман Яго Высокасцю Саідам Зеязінам бен Хайтамам Аль-Саідам.

Бакі падкрэслілі высокі ўзровень палітычнага дыялога паміж Беларуссю і Аманам, у аснове якога ляжаць асаблівыя сяброўскія адносіны, што ўстанавіліся паміж лідарамі дзвюх краін.

Суразмоўцы высока ацанілі вынікі правядзення першага пасяджэння беларуска-аманскага сумеснага камітэта па супрацоўніцтве і інвестыцыях, а таксама двухбаковыя сустрэчы паміж прадстаўнікамі галін і бізнес-супольнасцяў. 

«З задавальненнем адзначаны першыя практычныя крокі па ўзаемным адкрыцці пасольстваў у Мінску і Маскаце, якія закліканы садзейнічаць развіццю ў першую чаргу гандлёва-эканамічных адносін, пашырэнню існуючых і ўстанаўленню новых афіцыйных і міжасобасных кантактаў. Бакі пацвердзілі ўзаемную зацікаўленасць у прадаўжэнні рэгулярнага дыялога на вышэйшым і высокім узроўнях, а таксама гатоўнасць да ўдзелу ў мерапрыемствах, якія праводзяцца ў Беларусі і Амане», — расказалі ў МЗС.

У рамках візіту Максім Рыжанкоў таксама сустрэўся з Міністрам замежных спраў Султаната Аман Саідам Бадрам Аль-Бусаідзі.

Суразмоўцы падкрэслілі эфектыўнае ўзаемадзеянне па лініі знешнепалітычных ведамстваў дзвюх краін, абмеркавалі графік сумесных мерапрыемстваў на бліжэйшую перспектыву, уключаючы правядзенне сёлета ў Мінску кансультацый паміж МЗС.

Саід Бадр Аль-Бусаідзі адзначыў важнасць візіту беларускай дэлегацыі ў Аман. 

«Кіраўнікі МЗС пацвердзілі супадзенне пазіцый і ўзаемную падтрымку па ключавых пытаннях у рамках супрацоўніцтва на міжнародных пляцоўках. Падкрэслена важнасць развіцця эканамічных сувязяў, культурнага і гуманітарнага супрацоўніцтва, якія служаць базісам для ўмацавання і развіцця ўсяго спектра беларуска-аманскіх адносін», — расказалі ў беларускім знешнепалітычным ведамстве. 

Аманскі бок праявіў цікавасць да арганізацыі міжуніверсітэцкага абмену студэнтамі, асабліва ў галіне медыцыны. Перспектыўнымі напрамкамі для паглыблення ўзаемадзеяння названы таксама сферы навукі, тэхналогій і аховы здароўя.

Максім Рыжанкоў запрасіў аманскага калегу наведаць Мінск з афіцыйным візітам.

На сустрэчы беларускай дэлегацыі з Міністрам сельскай гаспадаркі, рыбалоўства і водных рэсурсаў Амана Саудам Аль-Хабсі было адзначана, што эканомікі дзвюх краін з’яўляюцца ўзаемадапаўняльнымі, што дасць магчымасць у бліжэйшы час кратна павялічыць тавараабарот паміж дзяржавамі. Бакі праявілі ўзаемную цікавасць да паставак прадуктаў харчавання: у Аман — малочнай і мясной прадукцыі, сыроў і сметанковага масла, у Беларусь — рыбы, морапрадуктаў, фінікаў і садавіны.

«Адным з асноўных напрамкаў практычнага супрацоўніцтва з’яўляецца работа па стварэнню на тэрыторыі Султаната сумесных прадпрыемстваў, якая праводзіцца цяпер, у тым ліку па вытворчасці дзіцячага харчавання і сухога малака. Выкарыстанне выгаднага геапалітычнага становішча Амана ў рэгіёне дасць магчымасць забяспечыць пастаўкі беларускай прадукцыі не толькі ў Аман, але і на рынкі іншых краін Персідскага заліва і Усходняй Афрыкі», — дадалі ў МЗС.

У ходзе сустрэчы члены беларускай дэлегацыі прэзентавалі аманскаму боку магчымасці айчыннай сельскагаспадарчай і самаходнай тэхнікі, адаптаванай пад умовы работы ў Амане, а таксама запрасілі аманскіх партнёраў узяць удзел у выставе «Белагра-2026» у чэрвені бягучага года. Адбылася таксама сустрэча беларускай дэлегацыі з Міністрам гандлю, прамысловасці і садзейнічання інвестыцыям Амана Анварам Аль-Джабры. Нараўне з арганізацыяй прамога гандлю таварамі аманскі бок праявіў зацікаўленасць у стварэнні сумесных прамысловых прадпрыемстваў на тэрыторыі дзвюх краін. У прыватнасці, цікавасць праяўлена да беларускай дарожнай і спецыяльнай тэхнікі, грузавікоў, пажарнага абсталявання.

Бакі намецілі далейшыя захады па пашырэнні наменклатуры беларускай прадукцыі для паставак на рынак Амана і ў трэція краіны.

Таксама адбыўся беларуска-аманскі бізнес-форум пад патранажам Максіма Рыжанкова і Прэзідэнта Аманскага інвестыцыйнага агенцтва Абдэльсалама Аль-Муршыдзі. На адкрыцці мерапрыемства з прывітальным словам выступілі таксама прадстаўнікі Нацыянальнага цэнтра падтрымкі экспарту МЗС Беларусі і Аманскай ГПП. 

У рабоце форуму прынялі ўдзел больш за 200 аманскіх кампаній, якія прадстаўляюць банкаўскую, харчовую, прамысловую, інвестыцыйную, фармацэўтычную, IT-сферы. Апроч прэзентацыі беларускага экспартнага патэнцыялу, на палях мерапрыемства адбыліся прамыя кантакты прадстаўнікоў бізнесу ў фармаце В2В, а таксама асобныя поўнафарматныя сустрэчы дзелавых колаў.