45-гадоваму жыхару Вілейкі патэлефанавалі з замежнага нумара, код якога адрозніваўся ад беларускага ўсяго адной лічбай, што не выклікала ў яго падазрэнняў. Суразмоўніца прадставілася супрацоўніцай Энергазбыту. Дзяўчына паведаміла аб пратэрмінаванай дагаворнай паслузе. Прапанова аформіць новы дагавор дыстанцыйна падалася зручнай, і мужчына назваў ідэнтыфікацыйны нумар свайго пашпарта. Неўзабаве ў Viber паступіў новы званок — цяпер нібыта ад супрацоўніка Следчага камітэта. Ілжэследчы паведаміў, што пашпартныя даныя мужчыны трапілі да ашуканцаў, а на яго імя афармляюцца крэдыты, якія прызначаны для «спансіравання Узброеных Сіл Украіны». Каб узмацніць ціск, аферысты патэлефанавалі ад імя «прадстаўнікоў Нацыянальнага банка». На пытанні жыхара Вілейкі пра тое, як маглі так хутка аформіць крэдыты, суразмоўцы сыходзілі ад прамых адказаў, толькі нагнятаючы трывогу. 

Пад выглядам будучага вобыску і магчымай канфіскацыі наяўных мужчыну пераканалі перадаць грошы «пазаштатнаму супрацоўніку», які нібыта даставіць іх у Мінск для дэкларавання. Па ўказанні куратара жыхар Вілейкі спакаваў $30,9 тыс. і 26 тыс. бел. руб. і перадаў незнаёмцу. 

На наступны дзень зламыснікі зноў звязаліся з мужчынам і высветлілі, што грошы ёсць і ў яго пажылой маці. Пад той жа падставай «дэкларавання» яны вымусілі яго перавесці 12 тыс.бел. руб. праз інфакіёск. Аферысты настойвалі на паэтапным пералічэнні грашовых сродкаў, каб пазбегнуць блакіравання буйных сум. 

14 лютага ашуканцы запатрабавалі, каб мужчына асабіста прыехаў у сталіцу «закрыць пытанні па крэдытах». Па дарозе да названага адраса ён трапіў у ДТЗ. Знаходзячыся ў шокавым стане, пацярпелы паведаміў пра гэта куратару, якая запатрабавала неадкладна выдаліць перапіску ў Viber. Менавіта гэта выклікала ў мужчыны першыя сур’ёзныя падазрэнні. Сваячка, якая прыехала на месца аварыі, заўважыла яго дзіўныя паводзіны і высветліла, што ён стаў ахвярай махляроў. Агулам жыхар Вілейкі страціў больш за 126 тыс. бел. руб. 

Па гэтым факце Вілейскім раённым аддзелам Следчага камітэта распачата крымінальная справа па ч. 4 арт. 209 (махлярства, здзейсненае ў асабліва буйным памеры) КК. Устанаўліваюцца асобы, якія маюць дачыненне да здзяйснення злачынства.