У міліцыю звярнуўся 86-гадовы пенсіянер, які тройчы перадаваў грошы тэлефонным ашуканцам. «Яго падманулі па „схеме водаканала“ і спачатку папрасілі назваць код з СМС, а затым сталі запалохваць. Ілжэправаахоўнікі сказалі, быццам бы ашуканцы атрымалі доступ да рахункаў пенсіянера і могуць абакрасці яго. Каб гэтага не адбылося, трэба апярэдзіць зламыснікаў і зняць наяўныя грошы, а затым перадаць іх на праверку», — расказала старшы інспектар АІГС ГУУС Мінгарвыканкама Марыя Квашэвіч.

Пенсіянер зняў з карткі каля 30 тыс. рублёў і па загадзе куратара пакінуў іх у тайніку ў гарадскім парку. Затым яму прапанавалі паўдзельнічаць у затрыманні банды злачынцаў. Пажылы мінчанін пагадзіўся, ён прадаў свой аўтамабіль з вялікай зніжкай, а грошы таксама пакінуў у сховішчы.

Ведала пра тое, што адбываецца, і яго жонка. Яна чула размовы мужа з ашуканцамі, але не распазнала падману. Паверыўшы тым, хто тэлефанаваў, пажылая жанчына зняла грошы і са сваёй карты. Муж аднёс іх ва ўмоўленае месца нібыта для праверкі.

Тыя, хто тэлефанаваў, абяцалі пенсіянерам, што ўсе грошы — больш за 70 тысяч рублёў і аўтамабіль коштам блізу $8 тысяч — будуць ім вернуты. Аднак праз некаторы час сувязь абарвалася. Праводзіцца праверка.

У міліцыі нагадалі, што сапраўдныя супрацоўнікі праваахоўных органаў не паведамляюць па тэлефоне пра ўзбуджэнне крымінальнай справы і не прапаноўваюць паўдзельнічаць у спецаперацыі. Калі паступіла такая прапанова, неабходна неадкладна пакласці трубку і звярнуцца ў міліцыю.