Сенатары прынялі шэраг важных законапраектаў. А ў пачатку пасяджэння шляхам тайнага галасавання Ігар БРЫЛЕВІЧ быў выбраны на пасаду намесніка Старшыні Савета Рэспублікі. Да цяперашняга часу ён быў намеснікам старшыні Пастаяннай камісіі Савета Рэспублікі па заканадаўстве і дзяржаўным будаўніцтве, старшынёй Брэсцкага абласнога Савета дэпутатаў. 

Раскажам пра адобраныя ў Савеце Рэспублікі законапраекты, якія датычацца розных сфер жыцця.

«Аб дзяржаўнай рэгістрацыі і ліквідацыі (спыненні дзейнасці) суб’ектаў гаспадарання». Старшыня Пастаяннай камісіі Савета Рэспублікі па эканоміцы, бюджэце і фінансах Раман БРОДАЎ адзначыў, што гэта адзін з фундаментальных законапраектаў эканамічных адносін. «Над ім працавалі больш за пяць гадоў, практычна ўсю мінулую пяцігодку, — расказаў сенатар. — І зроблена нямала. Прааналізаваны велізарны пласт міжнароднага вопыту, тое, як гэта адбываецца ў іншых краінах. А таксама тое, што мы не ўлічылі на папярэдніх этапах. Вельмі важна, што мы вывучылі назапашаны вопыт у сферы адносін з суб’ектамі гаспадарання». Праект закона і яго навацыі, са слоў парламентарыя, можна ўмоўна падзяліць на тры вялікія блокі. Першы — новая рэгуляцыя, гэта значыць тое, чаго не было да бягучага дня ў сістэме праваадносін. Другі — удасканаленне механізмаў, якія добра сябе зарэкамендавалі і патрабуюць удакладнення ў найлепшы бок. Трэці блок у сваю чаргу закранае меры, накіраваныя на абарону грамадзян, інтарэсаў дзяржавы і г. д.

Раман Бродаў падкрэсліў, што законапраект вельмі пазітыўны і важны. Ён цалкам адпавядае патрабаванням кіраўніка дзяржавы аб выбудоўванні сучаснай, эфектыўнай і празрыстай сістэмы дзяржаўнай рэгістрацыі суб’ектаў гаспадарання.

«Аб змяненні законаў па пытаннях рэгулявання зямельных адносін». Праект закона накіраваны на рэалізацыю даручэння Прэзідэнта Беларусі Аляксандра Лукашэнкі ў сферы зямельных адносін, узмацненне адказнасці мясцовых органаў улады за развіццё рэгіёнаў, а таксама на ўдасканаленне парадку канфіскацыі і прадастаўлення зямельных участкаў.

Старшыня Дзяржаўнага камітэта па маёмасці Віталь НЯВЕРА адзначыў, што перш за ўсё законапраектам пашыраюцца падставы для прымянення зямельнай амністыі за кошт выпадкаў самавольнага займання зямельных участкаў для вырошчвання сельскагаспадарчых культур і размяшчэння нестацыянарных аб’ектаў. «Замацоўваецца права выканкамаў у рамках зямельнай амністыі ў пэўных выпадках прадастаўляць зямельныя ўчасткі ў памерах, якія перавышаюць устаноўленыя заканадаўствам гранічныя памеры, а таксама зямельныя ўчасткі, самавольна занятыя з адступленнем ад зацверджаных горадабудаўнічых праектаў дэталёвага планавання, — дадаў Віталь Нявера. — Выканкамы надзяляюцца правам прадастаўляць растэрміноўку ўнясення платы за права легалізацыі самавольна занятых зямельных участкаў тэрмінам да пяці гадоў. Устаноўленая раней магчымасць ільготнага набыцця зямельных участкаў з паніжальным каэфіцыентам у прыватную ўласнасць або арэнду падаўжаецца да 1 студзеня 2028 года для ўніфікацыі з заканчэннем тэрміну дзеяння зямельнай амністыі».

«Аб змяненні Закона Рэспублікі Беларусь «Аб таварных біржах». З улікам практыкі прымянення палажэнняў Закона «Аб таварных біржах» дзеючы механізм рэгулявання дадзенай сферы ў цэлым захаваны. У той жа час у законапраекце рэалізуюцца прынцыпова новыя падыходы, накіраваныя на забеспячэнне абароны як дзяржаўных інтарэсаў у галіне біржавога гандлю, так і правоў і законных інтарэсаў удзельнікаў на атрыманне якасных паслуг пры правядзенні біржавых таргоў.

Намеснік міністра антыманапольнага рэгулявання і гандлю Алег ДЗІКУН акцэнтаваў увагу на асноўных навацыях гэтага праекта закона. «Па-першае, гэта замацаванне асноўных прынцыпаў біржавой індустрыі, — адзначыў ён. — Другая — стварэнне нацыянальнай сістэмы біржавых індэксаў. Трэцяя навацыя — увядзенне права біржавому брокеру заключаць біржавую здзелку ў інтарэсах некалькіх кліентаў. Чацвёртая — выключаюцца абмежаванні на рэалізацыю на біржавых таргах складскіх сведчанняў на сельскагаспадарчую прадукцыю». Законапраектам прадугледжаны і шэраг іншых новаўвядзенняў.

«Аб змяненні Воднага кодэкса Рэспублікі Беларусь». Праектам закона прадугледжваюцца змены падыходу да класіфікацыі вод і водных аб’ектаў, спрашчэнне парадку выканання работ на водных аб’ектах. Намеснік міністра прыродных рэсурсаў і аховы навакольнага асяроддзя Віктар ГАЛАНАЎ падкрэсліў, што істотнай прапрацоўцы падвергнуты паняційны апарат, які дапоўнены дваццаццю новымі тэрмінамі і іх азначэннямі. «Праектам закона таксама скасоўваюцца тры адміністрацыйныя працэдуры ў адносінах да суб’ектаў гаспадарання. А менавіта: узгадненне тэрытарыяльнымі органамі Мінпрыроды выканання на паверхневых водных аб’ектах работ, якія аказваюць шкоднае ўздзеянне на стан рыбных рэсурсаў, паколькі артыкулам 23 Закона Рэспублікі Беларусь „Аб жывёльным свеце“ прадугледжаны іншы парадак правядзення такіх работ; атрыманне дазволу выканкамаў аб прадастаўленні воднага аб’екта ў адасобленае водакарыстанне з выдачай дзяржаўнага акта на права адасобленага водакарыстання, паколькі дадзеная адміністрацыйная працэдура з 2015 года не атрымала практычнага прымянення, а таксама атрыманне заключэння ад Белдзяржгеацэнтра аб магчымасці здабычы заяўленых водакарыстальнікамі аб’ёмаў падземных вод».

На пасяджэнні чацвёртай сесіі Савета Рэспублікі таксама быў ратыфікаваны шэраг пагадненняў па пытаннях міжнароднай дзейнасці.  

Яна ВАЛАСАЧ

Фота БелТА