Працэдура ў пяць хвілін

Галоўным змяненнем у пастанове стала спрашчэнне парадку агляду транспартнага сродку. Цяпер у рэгістрацыйных падраздзяленнях ДАІ гэта працэдура ажыццяўляецца ў электронным выглядзе з дапамогай планшэта: фатаграфуюцца знешні выгляд аўто, нумар кузава і інфармацыя аб тэхнічных параметрах транспарту. Усе даныя ўносяцца ў электронную базу Дзяржаўтаінспекцыі, якія даступныя для зверкі па ўсёй краіне.

— Раней, каб прайсці агляд транспартнага сродку, трэба было звярнуцца ў падраздзяленне, у якім будзе ажыццяўляцца рэгістрацыя. Цяпер гэтыя дзеянні можна зрабіць у любым рэгістрацыйным падраздзяленні, — тлумачыць намеснік начальніка УДАІ УУС Мінаблвыканкама Дзмітрый Хрыстоўскі.

Асноўнымі прычынамі новаўвядзенняў з’яўляюцца Дырэктыва Прэзідэнта № 2 аб дэбюракратызацыі дзяржаўнага апарату, паскарэнне адміністрацыйных працэдур для грамадзян, а таксама зніжэнне нагрузкі на супрацоўнікаў Дзяржаўтаінспекцыі. Увесь працэс займае не больш за пяць хвілін.

— Калі вы прапісаныя ў Мінску, а купілі машыну ў Віцебску, то ў мясцовым аддзяленні ДАІ можаце зняць аўто з уліку, а таксама зарэгістраваць дагавор куплі-продажу. Затым ужо ў сталічным падраздзяленні зробіце рэгістрацыю транспарту, атрымаеце дзяржнумар з лічбай рэгіёна 7 або 8. Яшчэ раз паўтаруся: зняць з уліку аўтамабіль можна ў любой частцы рэспублікі незалежна ад рэгіёна, але рэгістрацыя і прысваенне нумара ажыццяўляюцца толькі па месцы прапіскі. Віцебск, Гомель або Магілёў не выдасць 5, 7 або 8, толькі свае лічбы рэгіёна, — тлумачыць Дзмітрый Хрыстоўскі і звяртае ўвагу, што з моманту рэгістрацыі ў ДАІ дагавора куплі-продажу адказнасць за правапарушэнні цалкам ляжаць на пакупніку.

Транспарт з ЕАЭС без «замарозкі»

Спрошчаная рэгістрацыя аўтамабіляў, увезеных з краін ЕАЭС. Да змен інспектары былі абавязаны накіроўваць запыт у дзяржаву, якая ўваходзіць у склад Саюза, на пацвярджэнне рэгістрацыі. Разам з гэтым на транспарт накладвалася абмежаванне на перарэгістрацыю. Працэдура займала да паўгода. І калі цягам гэтага часу адказ не прыходзіў, з аўто здымалася забарона.

— Гэтай працэдуры цяпер няма, і машыны з краін ЕАЭС ставім на ўлік у агульным парадку, без дадатковых запытаў. Для людзей гэта толькі плюс. Цяпер аўто не «замарожанае» на паўгода і яго можна перарэгістраваць калі заўгодна, — сцвярджае праваахоўнік.

Змены таксама закранулі так званыя самаробкі. Чалавеку, які вырабіў або вынайшаў транспарт, па тэхнічным рэгламенце трэба звярнуцца ў акрэдытаваную лабараторыю, каб атрымаць сертыфікат аб бяспецы канструкцыі і VIN-нумар, а таксама электронны пашпарт транспартнага сродку. Затым зарэгістраваць вынаходку ў ДАІ, дзе ў тэхпашпарце будзе стаяць адзнака: «Зняцце з уліку забаронена». Гэта датычыцца ўсіх відаў транспартных сродкаў, якія створаны ў выніку індывідуальнай творчасці. Рэалізоўваць дадзеную тэхніку нельга, і за такімі транспартнымі сродкамі ажыццяўляецца кантроль.

Зэканоміць базавую

Па словах начальніка МРА ДАІ УУС Мінаблвыканкама Аляксея Краўчанкі, большасць здзелак куплі-продажу аўто праходзяць у Мінску і некаторыя памылкова мяркуюць, што менавіта тут знаходзіцца галоўны рэгістрацыйны пункт.

— Усюды ўсё аднолькава. Наша тэрытарыяльнае падраздзяленне нічым не адрозніваецца ад іншых і ажыццяўляе тыя ж дзеянні, што і любое аддзяленне ў краіне. Штодня мы праводзім 400-450 адміністрацыйных працэдур. Найбольш інтэнсіўны паток па аўторках і суботах, — адзначае Аляксей Краўчанка і рэкамендуе праводзіць зняцце з уліку і рэгістрацыю па месцы прапіскі пакупніка: — Зразумела, што мінчанін не паедзе ў Брэст, у гэтым выпадку працэдуру можна прайсці ў нас у падраздзяленні. Справа ў іншым: бывае, уладальнік не ведае, што можна адначасова зняць і паставіць на ўлік аўто без удзелу транзітных нумароў. І зэканоміць пры гэтым адну базавую.

Для яснасці спецыяліст прывёў прыклад. Прадавец з Барысава, а пакупнік з Маладзечна, якія спачатку здымаюць машыну з уліку ў абласным аддзяленні ДАІ, затым займаюць чаргу і паўторна падаюць дакументы на транзітныя нумары, тым самым выконваючы двайную працэдуру.

— У дадзеным выпадку можна было дзейнічаць такім чынам: прадавец з Барысава прыязджае ў Маладзечна для пераафармлення дакументаў або пакупнік можа прыехаць да прадаўца і ажыццявіць дадзеную працэдуру, — заключае Аляксей Краўчанка.