У мінулым годзе набыты 93 сучасныя аўтакрамы, у тым ліку дзякуючы ўказу Прэзідэнта № 309 «Аб падтрымцы арганізацый спажывецкай кааперацыі» — 80, у 2024-м — яшчэ 110.

«У 2026 годзе плануецца набыць у адпаведнасці з указам яшчэ 50 аўтакрам. Таксама будзе працягвацца адкрыццё новых аб’ектаў, мадэрнізацыя, рамонт, рэканструкцыя. Дзякуючы Прэзідэнту і дзяржаве значна абнавілі свой аўтапарк», — расказала Вольга Кунцова, дадаўшы, што арганізацыі ўкладваюць і свае сродкі.

Сучасныя міні-маркеты на колах адпавядаюць усім неабходным тэхнічным, тэхналагічным і санітарным нормам, зручныя для абслугоўвання пакупнікоў і камфортнай работы прадаўцоў. Абсталяваны халадзільным абсталяваннем і нізкатэмпературнымі скрынямі, якія дазваляюць рэалізоўваць тавары, што патрабуюць асаблівага тэмпературнага рэжыму.

Паводле слоў Вольгі Кунцовай, камплектацыя фургонаў адпрацавана сумесна з МАЗам. 

«Каўбасныя, малочныя прадукты даязджаюць у адпаведнасці з тым тэмпературным рэжымам, які патрабуецца для захаванасці якасці», — расказала Вольга Кунцова. 

Арганізацыі спажыўкааперацыі імкнуцца максімальна задаволіць патрэбы жыхароў у харчаванні і прамысловых таварах, у тым ліку ўласнай вытворчасці.

Белкаапсаюз з’яўляецца найбуйнейшым гандлёвым аператарам у краіне. З 4,1 тыс. магазінаў сістэмы 3 тыс., або 73 %, размешчаны ў сельскай мясцовасці. Зона гандлёвага абслугоўвання 482 аўтакрам налічвае 12,8 тыс. вёсак з насельніцтвам звыш 442 тыс. чалавек. З іх у 10,3 тыс. пражывае да 50 жыхароў, а ў 4,6 тыс. — у кожнай трэцяй — не больш за 10 чалавек. Ёсць маршруты працягласцю да 200 км за рэйс — па 16-18 населеных пунктаў. 

Штогод крамы на колах праязджаюць 14 млн км. Аўтакрамы дастаўляюць прадукты паўсядзённага попыту да самых аддаленых і маланаселеных вёсак.