Пры праверцы рэалізацыі дзяржпраграмы па будаўніцтве прафілакторыяў для маладняку БРЖ высветлілася, што асобныя прадпрыемствы АПК фармальна падышлі да выканання патрабаванняў закона. Як вынік — неабгрунтаванае падаражэнне аб’ектаў і рызыкі па захаванасці маладняку.

Так, адна з гаспадарак раёна праігнаравала дзейсны механізм дзяржпадтрымкі. «Замест звароту ў лясгас прадпрыемства закупіла піламатэрыялы ў прыватнай арганізацыі па цане, якая перавышае ўстаноўленую дзяржавай. У выніку аб’ект неабгрунтавана падаражэў, а розніца паміж фактычна выплачанай сумай і коштам па фіксаванай цане перавысіла 18 тыс. рублёў», — растлумачылі ў пракуратуры.

А пры распрацоўцы праектнай дакументацыі заказчык не ўказаў праекціроўшчыку патрабаванне выкарыстоўваць драўляныя канструкцыі. Гэта прывяло да таго, што праект выканалі з прымяненнем жалезабетонных элементаў, што пазбавіла арганізацыю магчымасці ў поўным аб’ёме выкарыстоўваць ільготу, прадугледжаную пастановай Савета Міністраў № 799.

У іншым выпадку матэрыялы былі набыты ў лясгасе, аднак разлікі зроблены не па фіксаванай цане франка-склад вытворцы, а па больш высокай цане. Таксама ўстаноўлены факты парушэння справаздачнасці, калі, паводле статыстычных даных, аб’екты прафілакторыяў увялі ў эксплуатацыю з поўнай гатоўнасцю, фактычна ж тэхналагічнае абсталяванне ў будынках цалкам не было пастаўлена і зманціравана. «Адлюстраваны працэнт гатоўнасці характарызуе толькі завяршэнне будаўнічай часткі будынкаў, без уліку аснашчэння аб’екта, што сведчыць аб недакладнасці статыстычнай справаздачнасці і стварае рызыку нямэтавага выкарыстання сродкаў», — звярнулі ўвагу ў пракуратуры.

Праверка яшчэ аднаго прафілакторыя паказала на відавочныя прабелы ў захаванні вытворча-тэхналагічнай дысцыпліны і захаванасці маёмасці. Тэрыторыя аб’екта не была агароджаная плотам, уваходныя дзверы адчыненыя, работнікі на тэрыторыі і ўнутры памяшкання адсутнічалі. Староннія асобы мелі свабодны доступ да абсталявання.

Пракурор Стаўбцоўскага раёна ўнёс прадстаўленне ў райвыканкам, пазначыўшы шэраг патрабаванняў. Іх выкананне застаецца на кантролі.