«У нашых краін устойлівыя гандлёва-эканамічныя сувязі. Не будзе перабольшаннем сказаць, што нашы эканомікі ў многім узаемадапаўняльныя. І гэта абумоўлівае добрыя магчымасці для далейшага пашырэння нашага супрацоўніцтва ў розных сферах. У прыватнасці, размова можа ісці аб прамысловасці, сельскай гаспадарцы, транспартна-інфраструктурнай і лагістычнай галінах. У апошнія гады аб’ём узаемнага гандлю паступальна павялічваецца. У Туркменістане запатрабаваны беларускія малочныя, фармацэўтычныя тавары, прадукцыя дрэваапрацоўкі. Расце і аб’ём паставак з Туркменістана ў Беларусь. Сустрэчныя таварапатокі спрашчаюць лагістыку, аптымізуюць узаемаразлікі. Беларускім і туркменскім вытворцам ёсць што прапанаваць адзін аднаму, і мы гэта добра бачым у ходзе бізнес-візітаў, візітаў прадстаўнікоў беларускіх прадпрыемстваў у Туркменістан для ўдзелу ў розных універсальных і спецыялізаваных выставачна-кангрэсных мерапрыемствах», — сказаў Станіслаў Чапурной. 

У Туркменістане вялікая ўвага ўдзяляецца развіццю сельскай гаспадаркі, узмацненню харчовай бяспекі, развіццю і мадэрнізацыі транспартнай інфраструктуры. Беларускія прадпрыемствы гатовы прапанаваць сваю дапамогу, тэхналогіі і вопыт, у тым ліку ў аграпрамысловым сектары. Прапрацоўваецца наведванне туркменскай дэлегацыяй выстаўкі «Белагра».

Паводле слоў пасла, у беларускага боку ёсць інтарэс да сезоннай туркменскай прадукцыі — гэта і агародніна, і фрукты, і арэхі.

Прэм’ер-міністр Беларусі Аляксандр Турчын наведвае з рабочым візітам Туркменістан для ўдзелу ў пасяджэнні Савета кіраўнікоў урадаў СНД. Пасяджэнне савета пройдзе 22 мая ў Ашхабадзе ў вузкім і пашыраным складах. Па выніках пасяджэння кіраўнікі дэлегацый падпішуць падагульняючыя дакументы. Сёння кіраўнік беларускага ўрада таксама сустрэўся з прэзідэнтам Туркменістана Сердарам Бердымухамедавым.