Юныя беларусы і іх мамы актыўна ўдзельнічалі ў конкурсах, вучыліся рабіць ляльку і размаўлялі за чаяваннем. Пасольства Беларусі сабрала амаль 100 гасцей, якіх з Новым годам павіншаваў Надзвычайны і Паўнамоцны Пасол Беларусі ў Турцыі Анатоль Глаз. Ён звярнуў увагу на важнасць любові да дзяцей, блізкіх і Айчыны, а таксама непарыўнай сувязі са сваёй Радзімай.

Майстар-клас і свята для сваіх землякоў арганізаваў калектыў пасольства, усе госці пайшлі дадому з падарункамі з беларускіх прысмакаў.

Гісторыя беларускай лялькі-матанкі як народнай традыцыі сыходзіць каранямі ў старажытныя часы, калі жанчыны стваралі такія лялькі для абароны сваёй сям’і і дома. Лялька-матанка, як верылі нашы продкі, выконвае жаданні і засцерагае сваіх гаспадароў, іх дом, з’яўляецца сімвалам здароўя, шчасця і дабрабыту.

Дыпламатычныя адносіны паміж Беларуссю і Турцыяй устаноўлены 25 сакавіка 1992 года. У 1992 годзе было адкрыта Пасольства Турэцкай Рэспублікі ў Мінску, у 1997 годзе — Пасольства Рэспублікі Беларусь у Анкары.