Ёсць куды імкнуцца

Перад пачаткам пасяджэння ў пашыраным складзе кіраўнікі ўрадаў Беларусі і Азербайджана пагутарылі ў фармаце сам-насам. Аляксандр Турчын падзякаваў Алі Асадава за шчырую размову і цёплы, сардэчны прыём. 

— Беларусь і Азербайджан звязвае стратэгічнае партнёрства, не пабаюся гэтага слова. Наша партнёрства праверана часам, і ўзаемаадносіны двух нашых лідэраў — яркае таму пацверджанне. Краевугольны камень нашых адносін — гэта гандлёва-эканамічнае супрацоўніцтва, якое ахоплівае самыя шырокія сферы і адрозніваецца высокай інтэнсіўнасцю,-сказаў прэм’ер-міністр Беларусі

За мінулы год узаемны тавараабарот дзвюх краін паказвае значны рост, адзначыў прэм’ер. 

— Тым не менш, на мой погляд, нам ёсць яшчэ куды імкнуцца, таму ў нашай дэлегацыі ёсць шэраг кампаній, якія маглі б прапанаваць іншыя формы супрацоўніцтва, — звярнуў увагу кіраўнік беларускага ўрада.

Што датычыцца аднаўлення тэрыторый, Аляксандр Турчын падкрэсліў, што Беларусь гатова прапанаваць комплекснае рашэнне: жыллёвае будаўніцтва, развіццё вытворчай сферы, таму што людзям перш за ўсё патрэбны работа і зарплата. 

— Гэта тыя рэчы, якія мы сёння гатовыя больш шчыльна абмеркаваць з азербайджанскім бокам, — акцэнтаваў ён.

Важна і развіццё прамысловай кааперацыі, звярнуў увагу прэм’ер-міністр, у тым ліку ў напрамках пажарнай, спецыяльнай, камунальнай тэхнікі. На думку беларускага прэм’ера, можна разгледзець далейшае пашырэнне наменклатуры гэтай тэхнікі.

Праграма знаходжання ўрадавай дэлегацыі насычаная, і кіраўнік беларускага ўрада выказаў упэўненасць, што адносіны Беларусі і Азербайджана будуць толькі развівацца. 

— Думаю, што нашы сустрэчы павінны стаць рэгулярнымі, таму мы з задавальненнем чакаем вас у нашай краіне. У нас ёсць новыя напрамкі для руху наперад, — запэўніў Аляксандр Турчын

Развіццё па ўсіх напрамках

У сваю чаргу Алі Асадаў звярнуў увагу, што Азербайджан накіраваны на далейшае паглыбленне ўзаемавыгаднага супрацоўніцтва з Беларуссю. 

— Сёння ў нас адбыўся грунтоўны і канструктыўны дыялог тэт-а-тэт па найважнейшых пытаннях, якія будуць спрыяць нашаму далейшаму ўзаемадзеянню. Мы дамовіліся па ўрадавай лініі нарасціць сумесныя намаганні па рэалізацыі падпісаных пагадненняў і даручэнняў кіраўнікоў дзяржаў, — сказаў Алі Асадаў

Ён дадаў, што ў Беларусі і Азербайджана напрацаваны салідны багаж практычнага супрацоўніцтва, які падмацаваны вельмі шырокай дагаворна-прававой базай — паміж краінамі падпісана больш за 170 дакументаў.

Дзякуючы сумесным намаганням прэзідэнтаў Ільхама Аліева і Аляксандра Лукашэнкі беларуска-азербайджанскае партнёрства развіваецца па ўсіх напрамках і носіць ўсёабдымны характар, адзначыў Алі Асадаў. 

— Эфектыўнаму ўзаемадзеянню шмат у чым спрыяюць узаемныя візіты і сустрэчы на вышэйшым узроўні, — дадаў ён. — Пацвярджэннем гэтаму з’яўляецца 2024 год. Летась Аляксандр Лукашэнка двойчы наведваў Азербайджан. Падчас афіцыйнага візіту ў маі 2024 года быў падпісаны салідны пакет дакументаў, над рэалізацыяй якіх мы працуем

Ён падкрэсліў, што супрацоўніцтва дзвюх краін развіваецца добрымі тэмпамі і ў многіх напрамках. Ключавым напрамкам супрацоўніцтва Беларусі і Азербайджана прэм’ер-міністр назваў прамысловую кааперацыю.

— Асаблівай увагі заслугоўвае ўзаемадзеянне паміж Гянджынскім аўтамабільным заводам і вядучымі машынабудаўнічымі прадпрыемствамі Беларусі. Праект стварэння завода па зборцы ліфтаў паспяхова рэалізаваны. Мы стабільна развіваем партнёрства ў сферы сельскай гаспадаркі. Прадукцыя беларускіх вытворцаў карыстаецца добрым попытам на азербайджанскім рынку, — распавёў ён

Ёсць значны патэнцыял для павелічэння ўзаемных паставак сельскагаспадарчай прадукцыі, лічыць кіраўнік урада Азербайджана. 

— Мы гатовыя працаваць у гэтым кірунку, — запэўніў ён.

Па матэрыялах БелТА.

Кампетэнтна

«Мы гарантуем якасць ліфтаў, якія вырабляем. Для нас гэта вялікі поспех»

Дырэктар «Магілёўліфтмаш» Руслан Страхар распавёў, што Беларусь і Азербайджан развіваюць сумесныя ініцыятывы ў розных галінах, адной з якіх з’яўляецца вытворчасць ліфтаў. 

У прыватнасці, у Баку Аляксандр Турчын наведаў сумесную зборачную пляцоўку прадпрыемства «Vertus Engineering».

Вытворчасць была адкрыта ў 2022 годзе, а летась падпісана пагадненне аб супрацоўніцтве з ААТ «Магілёўліфтмаш».

На плошчах азербайджанскага прадпрыемства арганізавана вытворчасць асобных дэталяў і вузлоў, у далейшым партнёры пачалі закупляць камплектуючыя для зборкі ліфтаў на базе беларускіх камплектаў.