Пасяджэнне Эканамічнага савета СНД з удзелам віцэ-прэм’ераў краін Садружнасці пройдзе 3 красавіка ў Маскве. У гэты ж дзень намеснікі прэм’ер-міністраў прымуць удзел у пленарным пасяджэнні Міжнароднага эканамічнага форуму дзяржаў — удзельніц СНД, паведамілі БелТА ў прэс-службе Выканкама Садружнасці.
У праект парадку дня Эканамсавета СНД унесена 17 пытанняў. У прыватнасці, удзельнікі пасяджэння абмяняюцца думкамі па актуальных пытаннях эканамічнага супрацоўніцтва ў СНД, абмяркуюць палажэнне аб міждзяржаўным мерапрыемстве «Кірмаш Садружнасці», дзейнасць Кансультатыўнага савета па абароне правоў спажыўцоў дзяржаў — удзельніц СНД, пытанне аб прысуджэнні прэміі СНД 2025 года за дасягненні ў галіне якасці прадукцыі і паслуг.
Плануецца разгледзець вынікі рэалізацыі міждзяржаўнай мэтавай праграмы «Рэкультывацыя тэрыторый дзяржаў, якія падвергліся ўздзеянню ураназдабыўных вытворчасцяў», асноўныя напрамкі супрацоўніцтва дзяржаў — удзельніц СНД у галіне абыходжання з радыеактыўнымі адходамі, адпрацаваным ядзерным палівам і вываду з эксплуатацыі ядзерна- і радыяцыйна небяспечных аб’ектаў на перыяд да 2030 года.
У парадку дня пасяджэння — праект канцэпцыі лічбавай трансфармацыі галін горна-металургічнага комплексу дзяржаў — удзельніц СНД і плана мерапрыемстваў па яе рэалізацыі, праект міждзяржаўнай радыёнавігацыйнай праграмы на 2026—2030 гады. Намечана вызначыць базавыя арганізацыі дзяржаў — удзельніц СНД па кірунку павышэння якасці і дзелавой дасканаласці, а таксама развіцця прафесійных кампетэнцый спецыялістаў у галіне якасці, а таксама па падрыхтоўцы, павышэнні кваліфікацыі спецыялістаў і навуковых работнікаў вышэйшай кваліфікацыі ў галіне аквакультуры.
