Top.Mail.Ru

Пацярпелыя ў ДТЗ з дзікімі жывёламі могуць разлічваць на кампенсацыю. Як атрымаць страхавыя выплаты

Многія не ведаюць пра тое, што ў Беларусі існуе магчымасць атрымаць страхавую кампенсацыю шкоды, прычыненай жыццю і (або) здароўю, у выпадку ДТЗ з дзікімі жывёламі. А гэта ж з'ява для Беларусі нярэдкая, асабліва ў перыяды сезоннай міграцыі жывёл. Пра тое, як працуе гэты механізм і якія памеры страхавых выплат, расказаў БелТА генеральны дырэктар Беларускага бюро па транспартным страхаванні Ігар Клепча.

Паводле звестак ДАІ на 12 лістапада, з пачатку 2026 года ў ДТЗ з дзікімі жывёламі параненыя 93 чалавекі і загінулі 6 чалавек. Як адзначылі ў Беларускім бюро па транспартным страхаванні, часцей за ўсё да цяжкіх наступстваў прыводзіць сутыкненне з ласём.

«Шкода, прычыненая ў такіх ДТЗ, часцяком аказваецца вельмі істотнай. Менавіта таму, прымаючы пад увагу сацыяльную арыентаванасць нашай дзяржавы, каштоўнасць чалавечага жыцця і здароўя, былі прынятыя адпаведныя змены — удасканалены парадак правядзення абавязковага страхавання грамадзянскай адказнасці ўладальнікаў транспартных сродкаў (так званая „аўтаграмадзянка")», — адзначыў Ігар Клепча.

Так, Указам Прэзідэнта ад 18 сакавіка 2025 года № 108 унесены змены ў Статут Беларускага бюро па транспартным страхаванні, згодна з якімі стала магчымым пакрыццё шкоды, прычыненай жыццю і (або) здароўю кіроўцы (а таксама ўладальніка аўто, калі ён на момант ДТЗ з’яўляўся пасажырам) у выніку сутыкнення транспартнага сродку з дзікімі жывёламі. Звярнуцца за выплатамі можа сам пацярпелы, а ў выпадку яго гібелі — спадчыннікі.

«За паўтара года з моманту абнаўлення механізму страхавых выплат па ДТЗ з дзікімі жывёламі да нас звярнуліся ўсяго 13 пацярпелых: чатыры — у 2025 годзе, дзевяць — у 2026-м. Статыстыка зваротаў красамоўна кажа пра тое, што далёка не ўсе грамадзяне ведаюць аб сваім праве на пакрыццё шкоды ў падобных сітуацыях — а значыць, новаўвядзенні патрабуюць шырокага інфармавання грамадскасці», — падкрэсліў Ігар Клепча.

Пра якія сумы кампенсацыі шкоды ідзе гаворка

Пакрыццё шкоды ажыццяўляецца ў межах устаноўленага ліміту адказнасці. У цяперашні час ліміт адказнасці за шкоду, прычыненую жыццю і (або) здароўю пацярпелага, складае 1150 базавых велічынь, уключаючы 460 базавых велічынь на пакрыццё выдаткаў, звязаных з пахаваннем пацярпелага, асобам, якія панеслі гэтыя выдаткі.

Хто і пры якіх умовах ажыццяўляе дадзеныя выплаты

«Размеркаванне абавязацельстваў па кампенсацыі шкоды ў такіх ДТЗ выглядае наступным чынам. Беларускае бюро па транспартным страхаванні пакрывае шкоду кіроўцу транспартнага сродку і ўладальніку аўто, калі ўладальнік на момант ДТЗ з’яўляўся пасажырам, са свайго гарантыйнага фонду. Выплаты можна атрымаць незалежна ад таго, вінаваты кіроўца ў гэтым ДТЗ ці не. Аднак неабходна наяўнасць дамовы абавязковага страхавання грамадзянскай адказнасці ўладальнікаў транспартных сродкаў, заключанай у дачыненні аўто, якое ўдзельнічала ў ДТЗ. Страхавая арганізацыя, якая заключыла дагавор у дачыненні да такога транспартнага сродку, пакрывае шкоду іншым яго пасажырам», — растлумачыў Ігар Клепча.

Што падлягае кампенсацыі

Страхавому пакрыццю падлягае матэрыяльная шкода, прычыненая жыццю і (або) здароўю пацярпелага, выкліканая траўмай, калецтвам ці іншым цялесным пашкоджаннем, парушэннем або стратай здароўя або смерцю. Да матэрыяльнай шкоды, якая падлягае кампенсацыі, адносіцца страчаны пацярпелым заробак (даход), які ён меў альбо мог мець, дадаткова панесеныя выдаткі, выкліканыя прычыненнем шкоды здароўю пацярпелага ў выніку ДТЗ з дзікімі жывёламі.

  • Пад дадаткова панесенымі выдаткамі разумеюцца выдаткі на медыцынскую дапамогу (дыягностыку, лячэнне, медыцынскую рэабілітацыю, пратэзаванне), набыццё лекавых сродкаў, вырабаў медыцынскага прызначэння, перавязачных сродкаў, шыўных і дапаможных матэрыялаў, медыцынскія інструменты, прылады і апараты, матэрыялы для вырабаў медыцынскага прызначэння, рэагенты, вырабы з палімерных, гумавых і іншых матэрыялаў, якія ўжываюцца ў медыцынскіх мэтах, і іншыя, вырабы індывідуальнага догляду (санітарна-гігіенічныя вырабы, прадметы для догляду за пацярпелым), дадатковае харчаванне, старонні спецыяльны медыцынскі і старонні бытавы догляд за пацярпелым, санаторна-курортнае лячэнне і інш.

«Пры гэтым для атрымання страхавой кампенсацыі шкода жыццю і (або) здароўю кіроўцы або ўладальніка транспартнага сродку павінна быць нанесена менавіта ў выніку сутыкнення транспартнага сродку з дзікай жывёлай», — падкрэсліў Ігар Клепча.

Нематэрыяльная шкода, уключаючы маральную, а таксама шкода, прычыненая транспартнаму сродку і іншай маёмасці пацярпелага ў такім ДТЗ, па «аўтаграмадзянцы» не кампенсуецца.

arrow
Нашы выданні

Толькі самае цікавае — па-беларуску!

Напішыце ў рэдакцыю